Katol nga nabiyaan sulod sa usa ka kwarto ang posibleng hinungdan sa ikaduhang sunog nga niigo sa Brgy. Tejero, Dakbayan sa Sugbo niadtong Dominggo, Septiyembre 10, 2023 nga niugdaw og 20 ka mga balay sa sityo Laurente.
Ikaduha na kadtong sunog nga niigo sa barangay kay nianang mga ala 1 sa hapon, 32 ka mga balay ang nasunog sa sityo Back Blessed.
Si Leonil Rivera, hingkod, residente sa Sitio Laurente, maoy suspek sa sunog hinungdan nga siya gidakop sa kapulisan.
Si Rivera, sa pakighinabi sa media sa Lunes, Septiyembre 11, nagkanayon nga nagtuo siya nga gikan sa katol batok sa lamok nga iyang gigamit ug gibiyaan sulod sa iyang lawak sa ikaduhang andana ang sinugdanan sa kayo.
Sa pagbalik ni Rivera sa iyang lawak iyang nakita ang aso ug ang kayo daling nikatap.
“Di gyud to nako gusto mahitabo,” matod ni Rivera.
Si Rivera, atol sa adlaw sa sunog, niangkon sa media nga nigamit siya og ilegal nga drugas apan, dali usab kini niya nga gibakwi sa pagpahimakak sa pakighinabi sa kapulisan.
Si Senior Fire Officer Wendell Villanueva, information officer sa CCFO, niingon nga wala nay laing anggulo sa hinungdan sa sunog sa Sitio Laurente gawas lang nga tinuyo kini nga buhat tungod kay adunay mga saksi nga nisuway sa pagpahunong kang Rivera.
“Gi-workout pa karon ang pagpasaka og kaso, kasong arson sa maong suspek,” matod ni Villanueva.
Nangayo og pasaylo sa publiko si Rivera ug nanghinaut nga mapasaylo siya. (RJM)