Ang Committee on Laws, Ordinances, and Styling sa Cebu City Council nagkanayon nga ang Cebu City Traffic Management Committee (CCTMC) dili maka-rekomendar sa pag-blacklist o perpetually disqualified tungod sa paglapas sa mga city ordinance.
Ang report sa committee on laws may labot sa resolution sa TMC pagpa-blacklist sa JFAP Construction nga maoy contractor sa Metropolitan Cebu Water District pagtaod sa ilang linya sa tubig gikan sa Lobregat property sa Brgy. Busay paingon sa JY Square sa Brgy. Lahug.
Si City Councilor Rey Gealon, chairman sa committee on laws, base sa ilang committee report, nagkanayon nga ang mga pamaagi alang sa giingon nga blacklisting sa mga kontraktor kinahanglan nga himuon pinasubay sa guidelines nga gipagawas sa Government Procurement Policy Board (GPPB) ug dili pinaagi sa usa ka resolusyon nga gipagawas sa CCTMC.
“The CCTMC cannot go beyond the penalties provided in the ordinances violated by JFAP by recommending blacklisting, or worse, perpetual disqualification in the issuance of any work permits or the granting of awards in relation to any constructions within the City of Cebu, “ tipik sa committee report.
Ang Resolution No. 29-058-2023 nga pinetsahan og Marso 14, 2023, nagpakita nga ang CCTMC nigamit sa Section 2 (a) sa Cebu City Ordinance No. 1264 isip basehan sa ilang pag-blacklist.
Apan matod sa committee report ni Gealon, uban sa iyang mga miyembro nga silang City Councilor Phillip Zafra, Vice Mayor Raymond Alvin Garcia, wala sa maong ordinansa nga mahimo kining gamiton pag-recommend sa pag-blacklist og contractor.
Ang TMC, human sa ilang assessment ug imbestigasyon, nagkanayon nga ang JFAP construction napakyas sa paghatod sa mga obligasyon niini ngadto sa Siyudad, tungod sa kapakyas sa pagkompleto sa multi-million pipe-laying project, nga gikan sa JY Square Mall sa Salinas Drive sa Barangay Lahug hangtod sa Lobregat Property, Nivel Hills, sa Brgy. Busay, nga nahuman na unta niadtong Disyembre 4, 2022.