Lungsod sa Cordova nangandam sa komprehensibong paglambo sa turismo nga kabahin sa pagbalik sa floating cottages nga gipahunong human nasuta nga kontaminado ang kadagatan sa coliform bacteria gikan sa hugaw sa tawo.
Si Architect Buck Sia, presidente sa United Architects of the Philippines, atol sa iyang presentasyon niadtong Miyerkules, Disyembre 21, 2022, sa Cordova Sports Complex, nibutyag nga ang sikat nga industrial designer nga si Kenneth Cobonpue gikuha ni Cebu Governor Gwendolyn Garcia alang sa Cordova Ecotourism Redevelopment project.
Gibutyag ni Sia ang mga proyekto nga naglakip sa mosunod: pagpalambo sa mangrove park pinaagi sa Public-Private Partnership (PPP); publiko nga baybayon nga adunay komportable nga lawak o shower room; mga tindahan sa souvenir; parking area, floating cottages development sa boat camping site; pantalan o terminal sa sakayan; ug waste treatment facility.
Kabahin sa proyekto mao ang paglusad sa kompetisyon sa unang quarter sunod tuig sa pagdesenyo sa floating cottages diin gidapit ang registered ug lisensyado nga Filipino architects nga makigtambayayong sa designers, registered environmental planners, ug registered sanitary engineers.
“We’d like to create an ideal situation nga naa gyu’y collaboration, team work ni siya. Dili ra architect, dili ra engineer. Atong pangitaan og paagi nga unsa gyud ilahang i-resolve para sa atoang proposed ecotourism facility,” matud ni Sia.
Siya niingon nga ang ilang mga tumong mao ang paghimo sa usa ka ideya uban sa tinuod ug bag-o nga mga disenyo alang sa naglutaw nga mga estraktura aron sa pagpalambo sa ecotourism ingon man sa usa ka solusyon nga adunay mga criteria sa disenyo sa pagkamamugnaon, environmental consciousness, ug usa ka maayo nga engineered nga sistema.
Ang arkitekto niingon nga gusto nilang mahatagan og responsableng ecotourism nga panginabuhian ang katawhan dili lang gikan sa Cordova kon dili lakip na sa tibuok Sugbo ug Pilipinas.
Uban sa gisugyot nga pasilidad sa ecotourism, si Sia niingon nga ang mga lokal nga opisyal gusto nga masiguro ang responsable nga turismo, mas maayong panginabuhian, pagkasensitibo sa kalikupan ug saktong kalimpyo ug sanitasyon.
“Kinahanglan original, dili ta mangopya lang,” matud ni Cobonpue.
Si Cordova Mayor Cesar Suan niingon nga gusto nila nga mahimong modelo sa turismo ang lungsod dili lang sa Sugbo kon dili sa tibuok Pilipinas hinungdan nga ni-tap sila og international designers.
Gipasalig ni Suan sa stakeholders nga ilang unahon ang nauna nga mga nanag-iya sa mga cottage alang sa pagdumala niini samtang kadtong bag-o lang nakadumala apan wala makapanag-iya niini unahon alang sa giplanohang mga kiosk o tindahan.
Sa laing bahin, ang mayor niingon nga dili angay mabalaka ang publiko tungod kay nagplano sila nga magtukod og libre alang sa tanan nga pampublikong baybayon sulod sa 33 ka ektarya nga foreshore area.
DASIG CARDS
Ang Kagamhanan sa Probinsiya sa Sugbo, pinangulohan ni Garcia, niapud-apod og P10,000 nga balor sa matag Dasig Sugbo cards ngadto sa dul-an sa 200 ka mga tag-iya ug operator nga apektado sa pagsira sa fixed ug floating cottages sa lungsod niadtong Miyerkules.
Ang digital cards, nga ma-redeem, giingong mga regalo sa Pasko gikan sa Kagamhanan sa Probinsiya sa Sugbo.
Ang apektadong stakeholders una nang nakadawat og P10,000 gikan sa Kapitolyo aron gamiton sa boluntaryong pagguba sa ilang mga estraktura sa foreshore sa Barangay Poblacion ug Catarman sa Cordova.
“Hayag ang kaugmaon dinhi sa Cordova kon magtinarong lang ta. Way kumo kon magtinarong ta. Ang gangsa nga nangitlog og bulawan. Unsa man ni nga gangsa? Kini ang malimpyo nga kadagatan. Dili na nato patyon,” matud ni Garcia.