GIBUTYAG ni Konsehal Michael Dignos sa Dakbayan sa Lapu-Lapu nga wala na usab nila maaprobar ang gipangayong P81 milyunes nga supplemental budget number 3 SB 3 sa kagamhanan ni Lapu-Lapu City Mayor Junard Chan.
Kini human nga giingong walay supporting documents ang gisumiter nga liquidation ang Accounting Office sama sa vouchers atol sa gipahigayon nilang special session niadtong Miyerkules, Septiyembre 8.
Una niini, si Chan nipasangil sa mga konsehal nga giingong kaalyado ni Kongresista Paz Radaza nga gilangay ang pagpasar niini gumikan sa pulitika.
Apan, matod ni Dignos, nga sa P120 milyunes nga gahin sa Dakbayan kinahanglan nga i-liquidate tanan, ang P19 milyunes niini ang wala pa ma-liquidate.
Ang kantidad maoy nagasto sa Dakbayan kalabot sa Covid-19 response.
Gipadayag ni Dignos nga lakip sa ilang nabantayan atol sa deliberasyon mao nga adunay mga nasunogan sa dakbayan nga lakip sa gipalitan og mga pagkaon sa Covid response butang nga dili kini mahimo, sumala sa konsehal.
Dili usab pareho ang nadawat nga burial assistance sa mga namatayan sanglit ang uban nakadawat ug P8,000 samtang ang uban sobra pa.
Sa P81 milyones nga gahin sa SB3 P45 milyones niini ang alang sa Covid response, samtang P15 milyones ang alang sa burial assistance.
Ang ubang gahin alang na sa pagpamalit ug mga kahimanan sama sa mga computers.
Gipasabot ni Dignos nga kun ugaling namolitika pa sila ug dunay plano sa paglangay langay sa SB 3 dili na unta sila mopahigayon og special session alang niini ug maghuwat na lang sila sa ilang regular session matag semana.
“Ang ila gisulti sa amoa naa na kuno sa COA ang mga voucher pero under the Local Government Code the executive branch through the accounting office must retain a copy of the voucher whether digital or physical ug di kay tua ra sa COA ug di na nato ma retrieve,” matod ni Dignos.
Samtang, si Konsehal Rico Amores nibutyag usab nga andam nila atubangon ang taho nga giingong pasakaan sila og kaso nunot sa pagpahigayon og session niadtong Agusto 26 sa usa ka restaurant sa dakbayan.
Kini gumikan kay alang sa konsehal walay sayop kalabot niini sanglit anaa sa internal rules sa konseho nga mausab lang ang paagi sa pagpahigayon og face to face session sa konseho matag Huwebes ngadto sa Zoom kun ugaling mauyonan kini sa mayorya sa konseho.
Ug ang mayorya midesider nga mag-session og face to face niadtong tungora samtang ang uban mag-Zoom.(GCM)