Namatay ang usa ka konsehal sa lungsod sa Buenavista, Bohol human banhigi sa riding in tandem sa national highway sa Barangay Cangawa sa maong lungsod, alas 12:30 sa kaadlawon sa Biyernes, Oktubre 6, 2023.
Ang biktima giila sa iyang mga kabanay nga si Buenavista Municipal Councilor Danilo Añora, taga Barangay Dait Norte sa maong lungsod.
Sakay siya sa iyang motorsiklo padung na nga mopauli gikan nga nanari sa Buenavista Cockpit Arena apan pag-abot sa maong lugar, kalit siya nga gipusil sa nakaangkas sa laing motorsiklo tumong sa lawas niini.
Daling gidala ang biktima sa Dagohoy Hospital apan gideklarar sa doktor nga patay nang niabot.
Kapulisan sa maong lungsod nagpadayon pa sa ilang imbestigasyon.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, nga duna nay lead ang kapulisan sa Buenavista labot sa mamumuno. (AYB)