Konsehal sa Kamagayan gipasanginlang nanukmag

Usa ka kanhi Sangguniang Kabataan (SK) chairman sa Barangay Kamagayan, dakbayan sa Sugbo nipasangil nga siya pisikal nga giatake ug gihulga sa usa ka konsehal sa barangay.

Si Eric Bajarias, kanhi Barangay Kamagayan SK chairman, niingon sa interbyu sa news and commentary program Beyond the Headlines sa SunStar Cebu sa Miyerkules, Oktubre 11, 2023, nga niadtong Septiyembre 17, 2023 samtang naghulat siya sa traffic signal sa iyang motorsiklo sa dalan Junquera, si barangay konsehal Rene Roy Avila kalit nga niduol kaniya, gisumbag ang tuong bahin sa iyang lawas, ug gihulga siya.

“Paghuman niya og sukmag nako, nibahad dayon siya nga ipapatay tika,” ni Bajarias.

Si Bajarias niingon nga human sa pisikal nga pag-atake, siya mipadayon sa iyang destinasyon kay ang signal sa trapiko nagpakita nga “go.”

Matod niya nga dihang nahitabo ang insidente, wala dayon siya maka-react kay sakay siya sa iyang motorsiklo. Apan dihang nakahigayon siya, miadto siya sa Parian Police Station ug nitaho sa hitabo.

Dugang pa, nisang-at na siya og pormal nga reklamo sa Office of the Ombudsman niadtong Martes, Oktubre 10, 2023.

Siya niingon nga siya personal nga nakaila kang Avila ug wala siyay nahinumdoman nga bisan unsang panagbangi kaniya; bisan pa niana, siya nagtuo nga ang motibo luyo sa aksyon ni Avila mahimong politikanhong pangabugho, tungod kay nakigsulti siya sa pulitikanhong kaatbang ni Avila.

Isip tubag sa maong insidente, siya niingon nga andam siyang mopasaka og kaso batok kang Avila aron matubag ug mapugngan ang dugang pang mga abuso, ilabi na nga duna pay laing mga taho sa pagpangabuso nga gipasangil kang Avila.

Atol sa insidente, si Bajarias niingon nga si Avila dunay laing duha ka mga kauban, usa niini barangay peace and security officer, ug ang usa drayber sa barangay fire truck.

Hinuon, iyang giklaro nga ang laing duha ka mga tawo wala manghilabot o mobadlong kang Avila.

Gikontak sa SunStar Cebu si Rene Roy Avila alang sa iyang habig sa estorya aron matubag ang pasangil ni Bajarias, apan wala pa motubag si Avila hangtod sa oras sa pagmantala.