ANG Cebu City Council niumol og ad hoc committee nga motuon sa gidusong Joint Venture Agreement (JVA) tali sa Kagamhanan sa Dakbayan sa Sugbo ug Megawide Construction Corp. alang sa redevelopment sa merkado publiko sa Carbon.
Kini bisan kon ang Joint Venture Selection Committee (JVSC) nirekomendar na ngadto sa Konseho nga i-award sa mayor ang joint venture activity ngadto sa Megawide.
Tun-an og maayo sa komitiba ang terms and conditions.
Ang komitiba langkuban nila ni Konsehal Renato Osmeña Jr., tsirman sa komitiba sa market operations; Raymond Alvin Garcia, tsirman sa committee on law; ug Jerry Guardo, tsirman sa infrastructure committee; ug Joel Garganera, kinsa mosusi sa habig sa heritage side.
Apil sa komitiba ang gikan sa minority nga sila si Nestor Archival ug Franklyn Ong.
Matod ni Garcia nga ang komitiba motuon sa giduso nga JVA aron mahimoan og tukmang lakang sa Konseho.
Matod ni Garcia nga ang lakang sa Konseho magdepende sa unsay mapalgan sa komitiba.
Nirekomendar ang Cebu City Legal Office nga kinahanglan mopasar ang Konseho og resolusyon nga nagtugot sa mayor sa pagpirma og Terms and Conditions. Pipila ka mga konsehal nangutana kon unsa nay nahitabo sa proposal sa Cebu CFI Community. Matod sa konsehal nga tungod sa concerns sa pipila ka mga konsehal, ang ad committee mosusi sa proseso sa JVSC nga maoy nakaingon nga giuyonan kini sa komitiba.
Sa nangaging interview, si Cebu City Administrator Floro Casas Jr., kinsa maoy tsirman sa JVSC, nipasabot nga ang CFI wa moduso sa tanang rekisitos aron unta sila kwalipikado isip proponent.
Base sa terms and conditions sa proposed JVA sa di pa ang pagpalambo, kinahanglan amendahan sa Siyudad ang Market Code aron mabutang ang JVA; hawanan ug pabalhinon ang mga manindahay sa temporaryong luna; mohatag og easement sa right of way alang sa proyekto. (JJL)