UNAHON sa pagsusi sa transition team ni Governor-elect Gwendolyn Garcia ang mga kontrata ug accounting documents nga i-turnover unya sa transition team ni outgoing Governor Hilario Davide III.
Kini maoy gitug-an ni Atty. Frank Dinsay V samtang nagkaduol na ang pagpuli ni Garcia sa pagka-gobernador karong udto sa Hunyo 30.
Matod ni Dinsay nga karon pa lang, gusto na nilang masuta ang unod sa maong mga dokumento aron ilang ma-review ug mapangutana nila niini ang Davide transition team kon duna sila’y makit-an nga kwestiyonable nga mga detalye.
Gawas sa pagsusi sa gigastuhan sa kwarta sa panudlanan ug sa gisudlan nga mga kontrata, lakip sa tan-awon sa kampo ni Garcia ang budget karon sa Provincial Government ug uban pang mga dokumento gikan sa Davide administration.
Sa pagka-karon, nagpadayon usab ang Garcia transition team pagsuta sa uban pang mga lakang nga nahimo sa pamunu-an ni Davide aron pagsuta kon wa ba kini mga kakulian.
“We moved to meet earlier because we need those documents to review it, so that we can question it later or ask for additional documents,” sigun ni Dinsay.
Ang transition team ni Garcia tulo ka higayon nang nibisita sa Kapitolyo ug nipadangat og suwat ngadto kang Davide.
Lakip sa una nila nga mga mensahe mao ang pagpahunong sa konstruksiyon sa Provincial Resource Center ug pagpasidaan labot sa midnight appointments ug midnight deals.
Gawas kang Davide, gipasidan-an na og apil sa kampo ni Garcia ang kontraktor sa proyekto nga hunongon ang bisan unsang trabaho kay di sila bayran niini.
Niadtong Pebrero napirmahan ang kontrata tali sa Kapitolyo ug WT Construction alang sa tukoron nga edipisyo.
Ang kontrata maoy usa sa susihon sa Garcia administration kay matod ni Dinsay, wa mahatagi og awtoridad si Davide sa Hunta Probinsiyal pagpirma niini.