USA ka Korean national nga giingong sakop sa Korean mafia ang nadakpan sa Criminal Investigation and Detection Group (CIDG) 7 uban sa Bureau of Immigration (BI) ug Korean National Police Agency niadtong Miyerkules, Hunyo 2.
Ang nadakpan giila nga si Kim Byunggo, 43, nagpuyo sa usa ka condominium sa IT Park sa Barangay Apas, Siyudad sa Sugbo.
Dala sa CIDG Lapu-lapu City Field Unit sa pagpangulo ni Police Major Lirio Coral ang mission order nga giluwatan ni Jaime Morente, ang commissioner sa BID fugitive search unit, nga pinitsahan niadtong Mayo 24, 2021.
Matod ni Police Colonel Ireneo Dalogdog, hepe sa CIDG-7, nakadawat sila og impormasyon gikan sa BID 7 labot sa presensya sa Korean national nga gipangita a ilang nasud human nalambigit sa illegal nga kalihukan sama sa pagpangilad sa mga Korean citizen nga mobalor sa 20 million won o katugbang kini sa P10 milyunes sa Pilipinas.
Ang modus ni Byunggo giingong sama sa investment scam diin daghan ang ilang nabiktima nga naka-invest og minilyon.
Gidala na sa buhatan sa BID sa kaulohan si Byunggo aron iproseso na ang iyang pagpa deport paingun sa nasud sa South Korea aron manubag na sa kaso nga gisang-at batok kaniya. (AYB)