Tulo ka mga tawo, duha niini mga taga Lapu-Lapu, nasikop sa managlahing anti-drug operations sa mga awtoridad niadtong Huwebes ug Biyernes, Septiyembre 15, 2023.
Usa ka kusinero sa usa ka kan-anan nadakpan sa mga operatiba sa PDEA 7 atol sa buy-bust operation, alas 7:05 sa Biyernes sa gabii, Septiyembre 15, 2023 sa Sitio Hoyohoy, Brgy. Busay, dakbayan sa Sugbo.
Ang suspek giila nga si Martin Hentapan, 36, taga Brgy. Sirao, bukirang dapit sa dakbayan sa Sugbo.
Nakuha gikan kang Hentapan ang duha ka dagkong putos sa gituohang shabu nga motimbang og 50 gramos nga dunay street drug price nga P340,000, lakip na ang buy-bust money ug ang motorsiklo niini nga maoy gigamit sa iyang pagpamaligya sa ilegal nga drugas ug cellphone.
Matod ni Leia Alcantara, information officer sa PDEA 7, sila nakadawat og impormasyon gikan sa kasaligang tinubdan nga tungod ani ilang gipaubos sa tulo ka buwan nga case build up.
Ang suspetsado giingong sakop sa usa ka bag-ong drug group nga naglihok sa Metro Cebu.
Giingong makabaligya si Hentapan og 200 gramos nga supply sa ilegal nga drugas matag semana.
Niadto gihapong Biyernes, nasikop sab sa PDEA 7 ang usa ka drug personality sa Lapu-Lapu City.
Ang suspek giilang si Alfie Malanog, alyas Alfie Sumalinog, 41, taga Canjulao, dakbayan sa Lapu-Lapu.
Ang buy-bust gipahigayon sa Purok Caimito, Barangay Gun-ob sa mao nga dakbayan.
Nasakmit gikan kang Malanog ang lima ka pakete sa gituohang shabu nga motimbong og 10 gramos nga dunay street drug price (SDP) nga P68,000, lakip na ang buy- bust money, motorsiklo ug cellphone.
Sa impormasyon sa PDEA 7 makabaligya ang suspek og 50 gramos sa ilegal nga drugas matag semana.
Samtang niadtong Huwebes sa alas 3 sa hapon, nasikop sa mga sakop sa City Intelligence Unit (CIU) sa Lapu-Lapu City Police Office ug Provincial Drug Enforcement Group (PDEG) ang usa ka high-value individual (HVI) sa ilang operasyon sa sityo Seaside, Brgy. Pajo.
Nakuhaan og usa ka kilo sa gituohang shabu ang suspek nga giilang si Abdillah Otto Bertodan, alyas Abdila, 23, way trabaho, taga sityo Poblacion, dakbayan sa Talisay.
Ang drugas dunay SDP nga P1,000,000.
Matod sa LCPO nga si Bertodan courier sa usa ka binilanggo sa Cebu Provincial Detention and Rehabilitation Center (CPDRC) nga nag-operate sa mga dakbayan sa Lapu-Lapu ug Mandaue.
Sa ilang pagpaniid, ilang nasayran nga si Bertodan makabaligya og 500 gramos ngadto sa usa ka kilo sa shabu matag semana.
“I applaud the joint operating forces of PS3 LCPO CIU/CDEU and PDEG for the successful and unequivocal policing that proves our persistent and continuous campaign against illegal drugs to protect the rights and freedom of our youth and the peace of our community. Further, I expect that our men on the ground will continue to focus on their work and hunt down every impunity and stagnates in our city”, matod ni Police Colonel Elmer Lim, hepe sa LCPO, sa usa ka pamahayag.
Mga suspek pasakaan og kasong paglapas sa Republic Act 9165 kun Comprehensive Dangerous Drugs Act of 2002. / AYB, REV