NIDUSO sa iyang indifinite leave si Mayor Edgardo Labella ngadto sa Department of the Interior and Local Government (DILG) para hingpit na siyang makatutok sa iyang recovery gumikan sa iyang balatian.
Kini ang gipahibawo ni City Administrator Floro Casas Jr. aron makapadayon sa iyang capacity isip acting mayor sa siyudad si Bise Mayor Michael Rama ug si Konsehal Dondon Hontiveros nga magsilbing acting vice mayor.
Si Edgardo “Jaypee” Labella II, anak ni Mayor Labella, nikompirmar sa Biyernes atol sa filing sa certificate of candidacy (COC) nga di na gyud magpapili ang iyang amahan sanglit prayoridad niini mao ang pagpabalik sa iyang panglawas human siya nasakit.
Gitug-an ni Jaypee nga nakasinati na usab og mild pneumonia ang iyang amahan apan iyang gihulagway nga anaa ra sa maayong kahimtang ang mayor.
Si Rama, sa iyang bahin, nagkanayon nga magpadayon siya pag-asumir sa trabahuon isip mayor ug makig-alayon sa buhatan ni Casas para pagtunol sa batakang serbisyo sa mga Sugbuanon.
Ang acting mayor niingon nga tutokan nila ang pagserbisyo.
Iyang gipaneguro nga magpadayon og trabaho ang mga kawani sa City Hall ug wala siyay kausaban nga ipatuman.
Iyang gipaneguro nga mag pabilin ang set-up nga gibutang ni Mayor Labella.
“I don’t even have to think about changes, because it’s not my cup of tea to rock the boat. My cup of tea is to bring unity and harmony, unity despite diversity,” paghulagway ni Rama.
Kini maoy ikaunom nga pag-leave ni Labella human siya na-diagnose nga adunay sepsis sa unang quarter karong tuiga.
Nadiskobrehan ang sepsis human siya nag ear infection sayo sa 2021 nga giangkon ni Labella nga diriyot siya mamatay.
Si Labella ni-leave niadtong Septiyembre 20 hangtod sa Oktubre 3, 2021 aron magpa medical check up sa Manila sa iyang sepsis.
Ang sepsis maoy response sa lawas sa grabeng infection.(PAC)