Aduna nay gamayng kahayag ang Special Investigation Task Group (SITG) nga maoy nakatutok sa imbestigasyon sa pagpusil patay kang manlalaban Joey Luis Wee niadtong Nobiyembre 23 sa hapon, gawas sa ilang buhatan sa J. Panis street, Barangay Kasambagan sa siyudad sa Sugbo.
Kay base sa ilang nahipos nga mga closed circuit television (CCTV) camera footage, di lang duha ang killers, kon di, upat.
Matod ni Police Lieutenant Colonel Wilbert Parilla, deputy city director for operations sa Cebu City Police Office (CCPO) ug task group commander sa SITG Wee, nga naa na silay nakita sa mga kuha sa CCTV camera.
Sa case conference niadtong Huwebes, Disyembre 3, uban sa mga imbestigador sa Mabolo Police Station, Regional Intelligence Division (RID), Criminal Investigation and Detection Group (CIDG 7) ug Regional Anti-Cyber Crime Unit-7 (RACU0 7, ilang nasuta nga di lang duha ang killers, kon di labing minos upat ka mga tawo.
Gawas sa motorsiklo nga gisakyan sa riding in tandem, aduna silay nakit-an nga laing sakyanan gawas sa dapit nga nagsilbing spotter.
Ilang gituohan nga maoy nag monitor kon naabot na ba si Wee.
“Prior sa hitabo, diha siya nagbantay hangtod nalang nga nahuman. Unya maka ingon ta nga apil siya kay katong mga spotter didto mo duol man atong sakyanan,” matod ni Parilla.
Makita sa CCTV video nga gitionan usab sa armas ang ulo sa asawa sa dihang gipusil ang iyang bana.
Ang mga nakuha nila nga bag-ong CCTV ilang ipasusi sa RACU-7 aron ma enhance ug makuha ang plaka sa sakyanan nga taod-taod nga nakaestambay sa dapit diin gipusil patay si Wee.
Sunod semana, magpatawag na usab silag case conference diin uban na nila ang National Bureau of Investigation (NBI) 7.
Gibutyag usab ni Parilla nga ang asawa ni Wee nagdumil sa pakig-alayon kanila, apan nakasabot ra usab sila tungod kay naa pa sa trauma.
Gipasalig ni Parilla nga di nila lung-an ang imbestigasyon hangtod nga mapasakaan og kaso ang mga mamumuno.
Una nang nanawagan og hustisya ang mga kabanay ug kahigalaan ni Wee ug miawhag sa mga otoridad nga sulbaron ang pagpatay.