SA labing unang higayon, mo-host na ang Sugbo og online sabong sama sa gihimo sa kaulohan diin nahimo kining inila sa tibuok Pilipinas human sa kapin duha tuig usab nga wala tugoti ang tradisyonal nga sabong nunot sa pandemiya sa Covid-19.
Gumikan niini, ang Sabong Express mopasiugda og derby sa cockpit arena sa siyudad sa Talisay karong Marso 29, 2022 nga giulohan og “Ultimate Battle of Elites” 12 derby circuit season 1 nga salmutan sa mga nabantog na nga cockers sa Visayas ug Mindanao.
Matod ni Victor Sierra, ang usa sa mga nagdumala sa maong dakong event sa sabong sa Sugbo nga gipilian gyud pag-ayo sa komitiba ang mosalmot sa maong derby diin kadtong mga big time nga cockers.
Giangkon ni Sierra nga sa kadugay na sa panahon nga wala makabalik ang traditional nga sabong, dako na kaayo og alkanse ang mga mamuhiay og manok.
Ilabi na kadtong dagkong farm sa Sugbo nga una nang miapilar sa gobyerno sa dakbayan nga tugotan na sila nga makasabong apan tungod sa pandemiya, wala kini matigayon.
Sa dihang gitugotan na didto sa kaulohan ang online sabong, misalmot sila niini apan dako sila og magasto tungod sa kalayo sa kaulohan.
Misugyot ang Sabong Express nga mohimo usab silag susama sa gihimo didto sa Manila nga giablihan ang mga buwangan apan ang pustahanay ipaagi sa online aron dili magdasok ang mga tawo nga misanong sila niini.
Sukwahi kini sa naandan nga derby diin ang entrante ang mobayad nga gitawag nilag pot money tungod kay ang Sabong Express ang nihatag nga mobalor P12 milyunes diin ang matag cocker hatagan og tag P1 milyunes nga mosalmot.
Walay magasto ang cocker bisan usa ka piso
Kon molampos sila niining labing una ug labing dako nga sabong sa Sugbo ug ang online sabong nga gipadagan sa Sabong Express, ila kining padak-an sa sunod tuig aron makabenepisyo ang mga inilang sabongero sa Sugbo ug sa Mindanao.
“Sa una, one way man di ba? Ang cocker bayad sa pot money gastos sa manok dayon moadto sa online nya didto ra gyud ka mag bet sa ilaha. So, karon ang idea here, kung mo-grow ang online kay bag-o man ang Sabong Express diri, maybe next year P2 million na ang ihatag nila sa cocker,” matod ni Sierra.
Adunay 12 ka team diin ang matag team adunay upat ka miyembro nga maoy magbahin sa P1 milyon matag usa.
Gawas nga mobalik na nga makaduwa ang mga sabong enthusiast, mabuhi na usab ang ginagmay nga negosyo nga nagpalibot sa sabongan.
Sa pangutana kon unsaon paglikay sa nahitabong game fixing nga nahimong isyu sa kaulohan, matod ni Sierra, dili kini mahitabo dinhi sa Sugbo.
Matod ni Sierra, ang mga nagpaluyo sa Sabong Express naila nga elite team sa Sugbo ug professionals nga dili mosalmot sa illegal nga pamaagi.
Miawhag sila sa mga Sugboanon ug sa taga Mindanao nga mahiligon sa sabong nga suportahan ang Sabong Express aron mabuhi pagbalik ang tradisyonal nga sabong nga nahunong sulod sa kapin duha ka tuig tungod sa pandemiya.
Gikalipay usab nila nga aduna nay local government units ang mitugot sa pagbukas sa mga sabongan sa Metro Cebu ug sa probinsya.