Usa ka Super Health Center o modernong bersyon sa Rural Health Unit ang itukod sa Dakbayan sa Carcar nga madangpan sa labing kabos nga mga konstituwente sa habagatang Sugbo.
Kini maoy ikatulong Super Health Center nga giinagurahan karong tuiga sa lalawigan sa Sugbo, una sa Barangay Lagtang, Talisay City ug sa Barangay Poblacion, Cordova.
Si Senador Christopher "Bong" Go, kauban si Cebu Governor Gwendolyn Garcia, Cebu first District Representative Rhea Gullas, ug Carcar City Mayor Patricio Barcenas, nangulo sa ceremonial groundbreaking sa umaabot nga Super Health Center sa Barangay Poblacion 3, Carcar City niadtong Miyerkules, Hulyo 12, 2023.
Ang proyekto adunay mga pasilidad sa laboratoryo, botika, mga pasilidad sa pagpanganak, usa ka sentro sa outpatient, serbisyo sa ngipon, usa ka komprehensibo nga departamento sa outpatient sa PhilHealth, ug uban pang mga menor nga serbisyo.
Laing 19 ka mga pasilidad tukoron sa dili madugay sa lalawigan sa Sugbo, matod ni Senador Go, kinsa maoy nangulo sa Senate Committee on Health and Demography.
Tukoron kini sa Bogo City, Borbon, Danao City, Lapu-Lapu City, Mandaue City, Moalboal, Samboan, San Francisco alang sa 2022 budget nga nalangan sa miaging tuig ug dayon sa sa Carmen, Consolacion, Danao City, Liloan, Medellin, Talisay City, Toledo City, ug Cebu City alang sa 2023 budget.
"Senator Bong Go, ang imong mga proyekto kay mapahimuslan gyud sa atong mga ubos ug kabos nga mga kaigsuonan, salamat kaayo," matod ni Barcenas sa iyang speech live stream sa Sugbo News, Cebu Provincial Government media arm, niadtong Hulyo 12.
"Gikan sa Malasakit (Center) karon naa nasad ta (Super) Health Center kay makatabang kini sa atong mga pobre nga lumolupyo sa atong siyudad," dugang ni Barcenas.
Matod pa ni Go sa iyang pakigpulong nga ang Super Health Center usa ka medium-type sa Polyclinic, usa ka pasilidad nga naghatag og general ug specialized treatment susama sa usa ka ospital.
"Mas gamay sa ospital, mas dako sa rural health unit," matod ni Go, ug midugang nga kini makatabang sa pag-decongest sa mga ospital.
Ang Super Health Center unang gikonsepto niadtong 2021 sa dihang si Go nagbiyahe sa tibuok nasod ug iyang naobserbahan nga gikinahanglan ang pag-uswag sa rural health units sa ika-upat, ikalima ug ika-unom nga class nga mga lungsod.
"Ang mga buntis kay manganak nalang sa tricycle tungod sa kalayo sa ilahang mga ospital. Karon sa Super Health Center pwede diri ang birthing, dental, laboratory, x-ray (examination)," dugang ni Go.
Giawhag usab sa senador si Barcenas nga palapdan ang pasilidad nga adunay dugang nga mga dialysis machine, pagsiguro nga ang mga pasyente dili na kinahanglan nga mobiyahe sa Cebu City alang sa espesyal nga pagtambal sa kidney. (EHP)