PATAY ang usa ka 30-anyos nga lalake human mabanga ang gisakyang motor sa Toyota Grandia pasado alas 5 sa kaadlawon Sabado, Mayo 18 sa National Highway, Barangay Talaga, lungsod sa Argao.
Ang biktima giila nga si Ramonito Villamor Rollon, 30, taga Cabangcalan, Dakbayan sa Mandaue nga nagmaneho sa iyang Suzuki Smash nga adunay plate number 0701-822-333.
Matod ni Police Corporal Anthony Deparine nga padung sa Siyudad sa Sugbo si Rollon apan pag-abot sa kurbadahon mikawat matod paglinya ang driver sa Toyota Grandia nga aduna'y plate number GAB 8193 nga si Manolit Rama Arisala, 39, nga taga Sitio Banawa, Barangay Guadalupe sa Siyudad sa Sugbo.
Tungod sa kakusog sa impact sa pagkabangga, nalagpot og pila ka metros ang biktima nga si Rollon ug wala na matod pa kini maglihok.
Gidali pa siya pagdala sa Isidro Kintanar Memorial Hospital ang biktima apan gideklara kini sa duktor sa maong tambalanan nga patay na tungod sa kadaog sa ulo nga naangkon niini.
"Ang nahitabo ani kay kining van ni koan didto na sa kurbada 'nya ni kawat sa lane mao nang nag-head-on gyud sila sa motor, nadala pani sa ospital pero DOA (dead on arrival)," Matud ni Police Corporal Anthony Deparine.
Nagduda ang mga pulis nga wala maka-helmet ang biktima kay naa ra kini sa motor ug wala ra maunsa. (AYB)