USA ka wala mailhing lalake nga gituohang gi-salvage ang napalgang naglutaw sa kadagatan sa Shell Island, lungsod sa Cordova pasado alas 6 sa buntag, Biyernes, Agusto 23, 2019.
Ang maong lalake gibinaklid paggapos gamit ang nylon ug adunay gituohang samad pinusilan sa liog ug sa ulo.
Matod ni Police Chief Master Sergeant Marvin Ando, imbestigador sa Cordova Police Station, ang maong lalake posibleng gipatay sa habagatang bahin sa lalawigan sa Sugbo ug gidala sa sulog sa dagat paingon sa Shell Island.
Usa ka roving guard sa nagpadayong trabaho karon nga taytayan sa naasoyng dapit ang nakakita sa patayng lawas sa wala mailhing lalake nga gidagsa sa mamala.
Ang maong lalake nagsuot og pink nga T-shirt ug shorts, ug gibana-banang nagpangedaron og mga 30-anyos.
Walay nakaila sa lalake sa dapit diin kini mapalgi lakip na ang nga trabahante sa taytayan hinungdan nga posible gayud nga taga layo nga dapit ang biktima sumala sa kapulisan.
“Nakasiguro gyud ko nga wala na sa Shell Island nahitabo (ang pagpatay) kay aside sa atong security guard ngadto naa naa man tay mga sakop sa Provincial Mobile Force Company PMFC ngadto wala man gyud sila kadungog og buto-buto ngadto,” matod ni Ando.
Giawhag karon sa kapulisan sa Cordova ang mga nawad-an og kabanay sa pagbisita sa Surelife sa Dakbayan sa Lapu-Lapu aron sa pag-ila sa biktima.
Makig-alayon usab sila sa mga police station sa habagatang bahin sa lalawigan sa Sugbo kon duna bay taho nga na-missing nga mga tawo sa ilang mga area of responsibility.
Gikatakda usab nila nga ipaubos sa autopsy ang patayng lawas sa lalake aron sa pagsuta sa namatyan niini. (GCM)