Lalaki gidunggab sa ‘kainom,’ patay

Google Maps
Google Maps

Patay ang usa ka lalaki nga gidunggab sa waiting shed sa Purok 5, Barangay Montana, Lungsod sa Baclayon, Bohol pasado ala una sa hapon niadtong Sabado, Oktubre 8, 2022.

Giila ang biktima nga si Gaudioso Pamis, 56, residente sa Purok 4, Barangay San Roque sa samang lungsod.

Ang suspek, matod pa, iya ra sab nga kauban og inom.

Gitug-an ni Corporal Protacio Man-on, desk officer sa Baclayon Police Station nga ang suspek nailhan nga si Virgilio Talictic, 67, residente sa Barangay Montana.

Matod ni Man-on, nag-inom ang duha sukad niadtong Biyernes sa gabii, Oktubre 7.

Sa pagsusi sa kapulisan sa lugar nga giimnan sa biktima ug suspek, adunay duha ka basiyo nga botelya sa ilimnong makahubog.

Wa magdugay nasikop si Talictic pipila ka oras sa dihang gilusad ang hot pursuit operation.

Sa gihimong imbestigasyon, ang suspek niasoy nga gihapsan siya og bato ni Pamis sa dihang nagkalalis sila nianang adlawa.

Matod ni Talictic, wa siya mosukol ug igo nalang siyang mipauli.

Dihang nakatulog si Pamis, nibalik ang suspek nga aduna nay bitbit nga kutsilyo ug giingong nidunggab sa makadaghang higayon sa biktima nga maoy nakaingon sa iyang hinanaling kamatayon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph