American national nga giingong na-depressed nag jogging nga hubo sa kadalanan sa dakbayan sa Sugbo niadtong Huwebes sa gabii, Mayo 18, apan na-rescue sa kapulisan sa Cebu City Police Office (CCPO).
Ang iyang higala nga si Yurlie Chinie, sa Facebook post, nihulagway sa 54-anyos nga langyaw nga buotan apan “depressed kaayo” busa wa sa kaugalingon.
Ang ngan sa langyaw gipugngan ning mantalaan.
Matod sa higala nga pipila na ka mga semana nga wa sa maayong panghuna-huna ang langyaw.
Pasado alas 7 sa Huwebes sa gabii dihang nakit-an ang langyaw nga nagdagan sa RR Landon St., Brgy. San Antonio, nga nag jogging paingon sa dan Colon.
Gisuwayan siya sa pagpahunong aron pangutan-on unta sa iyang problema apan wa naminaw, nagpadayon sa pagdagan nga hubo.
Niabot siya sa Sawang Calero Police Station ug didto na gi hold sa mga polis.
Matod ni Police Staff Sergeant Leigh Vincent Gonzalve, imbestigador sa Sawang Calero Police Station, nga human nga nadawat nila ang taho, ila kining gi-hold.
Ila nang gipahibawo ang US Embassy kalabot sa nahitabo sa American national.