MAKIGTAGBO ang election officer sa Lapu-Lapu City ngadto sa kadagkuan sa city police office aron hisgutan kon angayang ibalik ngadto sa Orange gikan sa yellow category sa election watchlist areas (EWAS) ang dakbayan.
Si Atty. Rainer Layson, city election officer, nagkanayon atol unya sa ilang Joint Security Coordinating Council meeting tali sa mga opisyal sa LCPO ilabi na ni Police Colonel Limuel Obon, iyang ipaabot ang nahitabong shooting incident nga gikatahong may kalambigitan sa politika.
Ang pagpamusil na-blotter sa Police Station 3, diin usa ka Cesar Siaton, hamtong na ang pangidaron, giila nga lider/supporter ni mayoralty candidate Junard “Ahong” Chan, PDP-Laban ang gipusil sa Barangay Babag niadtong Abril 27 sa gabii.
Nasayran nga si Siaton mi-assist niadtong mga nangabot nga kandidato nga mo-park sa ilang mga sakyanan aron nga motambong sa gikatakdang pulong-pulong sa Babag, kalit lang milanog ang usa ka buto sa armas.
Gidali og dala sa city hospital ang biktima nga nakaangkon og samad pinusilan sa tiyan ug laing samad sa luyong bahin sa iyang lawas nga gituohang milapos ang bala.
Si PSgt. Galtierie Reales, imbestigador sa PS3, nagkanayon nga dili pa nila matambok kon kasungian sa politika ang hitabo sanglit nagpadayon pa ang ilang imbestigasyon.
Giingong luwan sa motorsiklo ang mamumuno samtang sa ilang pagsukit-sukit sa mga tawo sa maong area wa sila makabantay sa gunman.
“Na-istorya to nako iyang (Siaton) pag-umangkon sa ospital. Na-involve kuno ni siya og away bag-uhay lang, unya naay nasumbagan,” tipik sa pamahayag ni Reales nga nahinabi sa mga tigbalita.
Atol ning pagsuwat, gisusi pagbalik sa kapulisan ang nahitaboan, kon dunay CCTV camera.
“We need CCTV (footage) to support the claim,” paapas ni Reales.
Si Chan sa iyang bahin, ang mipatawag og press conference kagahapon Abril 29 mikuwestiyon sa tagdumala sa city hospital nga way stand-by driver ang ambulansiya sa city hospital aron unta madali sa pagbalhin ang ilang samaran nga supporter ngadto sa Vicente Sotto Memorial Medical Center (VSMMC).
“Twenty-four/seven man unta nang operasyon sa ospital. Nganong wa may drayber ilang ambulansiya?,” kuwestiyon sa kapitan sa Pajo.
Ang duty staff sa tambalanan giigong mihatag sa yawe sa ambulansiya aron mamaneho kini sa personal drayber ni Chan ug madala sa mainland Cebu ang pasyente.
Anaa na sa luwas nga kahimtang si Siaton human siya ma-operahi sa VSMMC.
Wa diha sa iyang buhatan si Dr. Cliff Canton, hospital chief City Hospital sa dihang giduaw sa tigbalita aron nga mapangayoan og pagpasabot.
Nabalaka si Chan sa sunodsunod nga pagpamusil sa iyang suporter ug nanawagan sa Commission on Election, Police Regional Director ug City Police Director nga kahatagan og aksiyon ang insedente. (FVQ)