ANG Lapu-Lapu City Health Office di na modawat og mga walk-in nga magpabakuna sugod sa Lunes, Hunyo 7, 2021.
Mao kini ang gipahibawo ni Dr. Agnes Realiza, pangulo sa City Health Office sa Dakbayan sa Lapu-Lapu human dunay giingong “kagubot” niadtong Huwebes, Hunyo 3, 2021 sa vaccination site sa Gun-ob Elementary School sa Brgy. Gun-ob.
Aron di na masubli ang hitabo, di una sila manawat og mga walk-in alang sa nagpadayong vaccination sa mga senior citizens ug persons with comorbidities.
Tumong nila nga kalikayan ang dinumogay ug pagdasok sa mga tawo nga modagsa sa vaccination site nga dili na hinuon masunod ang minimum health protocol sama sa physical ug social distancing.
Usa ka senior citizen nga magpabakuna alang sa iyang second dose sa Gun-ob site, nireklamo sa Superbalita Cebu nga niabot pa og lima ka oras una siya nabakunahan. Matod niya nga nagdasok ang mga tawo sa site hinungdan nga napungot ang usa ka health officer, gibunal ang usa ka bangko niini.
“Nagkagubot man diri Gun-ob vaccination center gahapon,” matod sa nagpabakuna nga nihangyong di nganlan.
Gipadayag ni Realiza nga kon ugaling aduna gihapoy moadto nga walk-in sa ilang mga vaccination site, nagtagana na sila ani og laing lane aron dili na mosagol sa linya sa naka schedule na nga bakunahan gumikan kay nakaregister na online o naka fill-up og form sa ilang barangay.
Di hinuon diha dayon mabakunahan ang usa ka walk-in human marehistro, i-schedule pa kini og laing adlaw.
Pinaagi niini dili mausik ang pag-adto sa mga walk-in sa ilang mga vaccination site.
Gipasabot ni Realiza nga nadesisyonan kini sa kagamhanan human nga daghan ang nidagsa sa mga vaccination site sa milabayng mga adlaw nga miresulta sa gamayng kagubot kon kinsa ang unang maturokan ug maatiman.
“Nidaghan gyud ug nangadto siguro kay ganahan na gyud kaayo sila magpabakuna ba. Na educate na sila mao medyo naay mga kagubot gamay mga ingon-ana nga scenario,” matod ni Realiza.
Aron kalikayan pa gayud ang paghuot sa mga vaccination site sa dakbayan, hayan dugangan usab sa kagamhanan ang vaccination site.
Plano karon sa kagamhanan nga momontar og vaccination site sa Island Central Mall sa Brgy Ibo ug sa City Auditorium sa Brgy Pajo.
Dugang kini sa kasamtangang vaccination site nga mao ang Gun-ob Elementary School ug Brgy Agus Gymnasium.
Nanghinaot si Realiza nga magamit na kini nga mga vaccination site sunod semana sa higayon nga makadawat na usab sila og laing dose sa bakuna.
Gibutyag ni Realiza nga sa pagkakaron moabot na lang sa 1,000 ka bakuna ang nahabilin sa dakbayan.
Sa papagkakaron, moabot na usab sa 16,240 ka mga indibidwal ang nabakunahan na sa dakbayan. Ang 13,208 niini first dose samtang 3,212 ang naka second dose na usab.
Sa pagsugod sa pagpamakuna, gamay ra ang nanunga sa site sa Siyudad, apan samtang nag-irog ang mga adlaw, nagkadaghan na kini.