KAGAMHANAN sa dakbayan sa Lapu-Lapu nagtinguha sa pakig-alayon sa mga silingang local government unit (LGU) nga mohulma og komitiba nga matabangan og limpyo ang Mactan channel diin sagad sa mga hugaw nga madagsa sa channel naggikan sa mga kasapaan sa Cebu ug Mandaue City.
Kini may kalabutan sa paglusad sa “Go Green” karong Sabado, Disyembre 3 nga usa ka enviroment activity nga pangandam sa kasaulogan sa enviroment month sa Hunyo sunod tuig.
Si Mayor Paz Radaza miklaro nga wa siyay gibasol sa pagbanlas sa mga basura nga matipun-og sa kadagatan sa Lapu-Lapu, apan aron nga mas epektibo ang paglimpyo sa Mactan channel nagkinahanglan og abag gikan sa ubang LGU.
“There is a need to create a body to address this (pollution sa Mactan channel)," matod ni Dr. Alexander Gestopa, city consultant on environment.
Nisugyot si Radaza nga ang matag city environment and natural resources offices (CENRO) gikan sa laing siyudad ang magsabot ug mohulma og memorandum of agreement (MOA) alang sa maong katuyoan.
Si Engr. Roderico Tagaan, CENRO chief sa Lapu-Lapu sa iyang bahin nagkanayon nga dili pa igo nga matag upat ka buwan o sa matag buwan mohimo og coastal clean-up sa area kay padayon gihapon ang pagbanlas sa mga basura, ilabi na nga magpataka lang gihapon og labay ang mga residente sa ilang hugaw.
Gipahunumdum sab ni Radaza ang matag barangay opisyal sa pag-monitor sa ilang nataran.
Pinaagi sa “Go Green” gidasig ang 30 ka barangay sa mainland Lapu-Lapu ug isla sa Olango nga mosalmot sa maong kalihokan diin kadtong barangay nga nagtamod sa local ug national environmental laws ang hatagan og pasidungog nga “Environment Friendly Barangay” ug ganti nga mapahimuslan sa winning barangay. FVQ