NAGSUGOD na pagpangandam ang Lapu-Lapu City Government sa ila unyang pagdawat sa imahe sa balaang bata Senior Sto Niño sa dili pa ang fluvial procession sa Enero 19, adlawng Sabado.
Kahinumdoman nga sa miaging tuig ang imahe sa balaang bata nasugdan nang dalhon sa simbahan sa National Shrine sa Virgen dela Regla sa dakbayan gikan sa National Shrine sa St. Joseph sa Mandaue alang sa usa ka santos nga misa sa dili pa ang tinuig nga fluvial procession sa bisperas sa Fiesta Senyor.
Nunot niini nagsugod na ug trabaho ang engineering department sa Lapulapu sa stage sa dapit diin sugaton sa mga opisyales sa dakbayan ang imahe sa balaang bata alas 4 sa kadlawon sa maong adlaw.
Adto kini ipahimutang sa may dan M.L Quezon sa Brgy. Pajo ug nahimutang dapit ra gayud sa tiilan sa Mandaue-Mactan Bridge.
Modayan-dayan unya sa pagsugat sa imahe sa balaang bata ang mga Sinulog dancers sa nagkadaiyang tunghaan sa dakbayan.
Gibutyag ni Lapu-Lapu City Mayor Paz Radaza nga sama sa miaging tuig sirad-an ang bahin sa dan ML Quezon nga paingon sa simbahan alang sa foot procession sa imahe sa balaang bata human unya sa ilang pagdawat niini sa tiilan sa Mandaue-Mactan Bridge.
Gumikan kay napanglantawan nga mas modoble o triple pa ang gidaghanon sa mga deboto nga motambong unya sa kalihukan gikatakdang mag montar ang city government ug mga wide screen monitor sa sports complex tupad sa simbahan alang niadtong dili na makasulod sa simbahan.
Nasayran nga sa miaging tuig nabahin ang mga tawo nga mitambong sa kalihukan sanglit ang uban wala na man lang moadto sa simbahan ug inay naghuwat na lang sa kadalanan paingon sa Brgy Looc diin nanukad ang fluvial procession sa base sa Naval Forces Central (NavForCen).
Apan karong tuiga gikatakdang manukad na ang fluvial procession sa Muelle Osmeña wharf nga nahimutang luyo lang sa simbahan inig ka human sa santos nga misa.
“Posible (nga mas daghan ang tawo) kay dili naman moadto (sa Looc) kay ari naman ta sa Muelle” pasabot ni Radaza.
Ang Lapu-Lapu City Police Office una nang namahayag nga maximum security gayud ang ilang ipatumang seguridad atol sa kalihukan.
Nunot niiini giawhag na ni Radaza ang mga tanod sa tanang barangay sa mainland lakip na ang mga sakop sa City of Lapu-Lapu Allied Force (CLAF) sa pag-abag sa kapulisan sa pagsiguro sa kahapsay ug kalinaw sa tibuok kalihukan.
Subling gipahinumdom sa mayor nga gidili ang mga balloons ug mga pabuto sa rota nga agian sa foot procession sa imahe sa balaang bata.
Wala ra hinuoy sakayang pandagat ang dakbayan nga mosalmot gayud sa fluvial procession.
“Kung mahimo dia namo diri mga alas 2 o wala pay alas 2 kay para maplastada na nato ang inyong lugar kung asa mo makabarog ug unsa unya dad-an inyong imahe sa Senyor Sto Nino” awhag ni Radaza sa mga Oponganon nga buot motambong sa kalihukan. GCM