NAGPLANO ang Department of Health (DOH)-Central Visayas nga ipaubos sa autopsy ang lawas sa masuso nga namatay human gipabakunahan.
Si Dr. Jaime Bernadas, direktor sa DOH 7, nagkanayon nga sila mobisita sa pamilya sa masuso karong Lunes, Disyembre 16, 2019.
“Wa pa makompleto ang atong data. Initially, ang nakuhaan pa lang nato didto sa Eversley Child Sanitarium and General Hospital. Unya nabal-an nato nga didto nadala sa Amosup Seamen’s Hospital- Cebu. Unya ang parents sa Lunes pa magpabisita,” matod ni Bernadas.
“Sa Lunes pa nato ni mahibal-an kon unsay plano nga atong makuan sa ilaha kay ang ato jud nga plano, mo-request ta og autopsy para sa bata. Kami mo-facilitate og kinsay mo-autopsy,” dugang niya.
Matod ni Bernadas nga mamahimo sila nga makig-alayon sa National Bureau of Investigation-Central Visayas alang sa pagahimuon nga autopsy, kini kon motugot ang pamilya.
Sigon ni Bernadas nga nakapadala na og taho sa insidente ang Eversley hospital ngadto sa DOH 7, apan iya pa nga huwaton ang resulta sa imbestigasyon nga gipahigayon sa iyang team. Ang maong team gilangkuban sa mga personel sa Regional Epidemiology and Surveillance Unit (Resu), sa DOH 7, nga gipangulohan ni Dr. Jonathan Neil Erasmo, local health support division head.
Niadtong Biyernes, Disyembre 13, nipahigayon na ang team sa ilang initial nga “fact finding” sa tulo ka mga hospital nga gidalhan sa bata lakip na ang Eversley hospital, Amosup Seamen’s Hospital- Cebu, ug Maayo Medical.
MOKIHA
Andam mopasaka og kaso ang ginikanan sa masuso batok sa Eversely Child’s Sanitarium and General Hospital kon dili kini makakita og hustisya sa gibuhat nga imbestigasyon.
Niadtong Biyernes, nipasiugda og imbestigasyon ang DOH sa tinuod nga hinungdan sa kamatayon sa masuso, lakip sab ang gobyerno sa Mandaue City.
Si Johnnel Abello nga nahinabi sa Sun.Star Cebu nikompirmar nga ang DOH mibisita na sa ilang balay aron pangayoan sila og saysay sa hitabo sukad nga ang bata gianak.
Mapasalamaton si Abello nga adunay gibuhat ang awtoridad aron mas dali nilang makuha ang hustisya nga ilang gipangita alang sa ilang anak.
Andam silang mokooperar sa imbestigasyon.
“Unsa man diay ilang ganahan, wala nalay kaso. Kon sa ila kaha nga anak na mahitabo, modawat diay kaha sila nga wala lang? Wala man gani sila nihatag kon unsa ilang side,” sigon ni Abello.
Sa pagkakaron, nakigsulti sila kanunay sa ilang abogado ug nagpaabot sa explaination sa hospital.
Sa laing pakighinabi, si Mandaue City Councilor Nerissa Soon-Ruiz, niingon nga ang local health board o ang Gobyeno sa Mandaue nga muimbestigar, motuki niini karong Martes, Disyembre 17.
Nahibawo na si Ruiz sa inisyal nga imbestigasyon sa DOH, apan maghimo gihapon sila og laing imbestigasyon.
“Ang DOH aduna nay initial findings gahapon pero naghimo pud mi og amoang impartial investigation. So, Tuesday ang meeting,” matod ni Ruiz. /