Ang Department of Information and Communications Technology (DICT 7) makig-alayon sa mga local government unit (LGUs) aron mapadali ang pagpatuman sa mas aktibong ‘free public wifi’ sites sa Central Visayas (CV).
Giangkon ni DICT 7 Director Frederick Amores niadtong Martes, Agusto 1, 2023, nga adunay gamay nga gidaghanon sa aktibo nga free wifie sites sa rehiyon.
Sa CV, adunay 137 ka aktibong free wifi sites: 57 sa Negros Oriental, 43 sa Cebu, 35 sa Bohol, ug duha sa Siquijor.
Kini ang gibutyag ni Amores sa iyang presentasyon atol sa Regional Multistakeholder’s Consultation on the National ICT Development Agenda sa One Central Hotel, dakbayan sa Sugbo niadtong Martes.
Dugang niya nga 74 porsiyento niini nga aktibong sites nahimutang sulod sa state universities and colleges (SUCs).
Samtang ang 9 porsiyento anaa sa mga publikong eskwelahan, 7 porsiyento sa buhatan sa national government agencies (NGAs), 4 porsiyento sa LGU offices, 3 porsiyento sa mga ospital nga gipanag-iya sa gobiyerno ug usa ka porsiyento sa mga pampublikong plaza.
Matod ni Amores nga ang pagdirekta sa LGUs makapapaspas sa pag-instalar sa mas aktibong mga site sa rehiyon alang sa pag-ila sa mga dapit nga butangan sa libreng wifi access, partikular sa mga barangay ug mga lugar nga limitado o walay internet access.
“Before, DICT ang tanan, meaning kami ang mobayad sa contractor, kami ang motaud, kami ang tanan. It is very slow process, but mas dali kon nagtrabaho mi sa LGUs kay kabalo sila kon asa man ibutang,” matod ni Amores. (EHP)