Gilusad sa Kagamhanan sa Probinsiya sa Sugbo ang libreng sakay alang sa mga pasahero sa Semana Santa.
Kini maoy gipahibalo sa kagamhanan subay sa pagdagsa sa mga pasahero nga manguli sa ilang tagsa-tagsa ka mga lugar sa adlaw’ng Miyerkules, Abril 1, 2026, katapusang adlaw sa trabaho sa dili pa ang long weekend o holiday.
Ang libre’ng sakay mapahimuslan sa Cebu North Bus Terminal ug Cebu South Bus Terminal nga adunay tag-upat ka mga bus nga gitagana.
Paagi kini aron maseguro nga maluag-luagan ang major transport terminals samtang mahimong libre ang masakyan sa mga vulnerable sector sama sa senior citizens, persons with disabilities (PWDs), buntis, ug pamilya nga mobiyahe nga dunay mga masuso o batang gagmay nga dala.
Si Ahmed Cuizon, administrator sa terminals sa Probinsiya sa Sugbo, nagkanayon nga ang maong programa kabahin sa mas lapad nga paagi sa Kapitolyo paghatag og inclusive public services atol sa peak season.
Subay niini, giawhag ni Cuizon ang mga pasahero lakip na ang mga drayber nga magbinantayon ug magmatngon sa pagbiyahe pagseguro nga luwas nga makapauli ang tanan paingon sa tagsa-tagsa niini ka lungsod ug siyudad.