Unang nakabanepisyo sa libreng wireless fidelity (wifi) connection ang 50 sa kinatibuk-ang 80 ka mga barangay sa dakbayan sa Sugbo sa panagtambayong sa PLDT ug Cebu City Government.
Ang mga koneksyon sa wifi gi-install sa mga lokasyon nga daghang tawo sama sa palibot sa mga barangay hall, gym, ug uban pang mahinungdanong lugar.
Si Dax Arcilla, pangulo sa Management Information and Computer Services (MICS), nisaysay sa SunStar Cebu nga ang nahabiling 30 ka mga barangay naa sa bukirang dapit nga gikatakda nga mabutangan usab sa dili pa motapos ning tuiga.
Gitumbok ni Arcilla nga kuwang sa imprastrakura sa komunikasyon ang maong mga barangay hinungdan nga gipauwahi una. Dugang niya nga usa lang ka libreng wifi connection gibutang sa matag barangay.
Sumala sa ilang pamahayag, ang PLDT Enterprise nakig-alayon sa mga lokal nga kagamhanan aron pagpalambo sa access sa ilang mga lungsoranon sa impormasyon ug uban pang mga serbisyo sa gobiyerno.
Gawas sa fiber broadband internet, ang PLDT Enterprise mohatag usab og gahom sa Kagamhanan sa Dakbayan gamit ang cloud-managed access point nga makapahimo sa pag-monitor sa real-time alerts kon adunay mga isyo sa koneksyon.
“We are fully supportive of the local government of Cebu City’s digital aspirations, and we are happy to be their trusted partner in helping improve the experience of their constituents, especially in maximizing the city’s digitally enabled services. With their barangay Wifi project, no constituent in Cebu City will be left behind,” matod ni Kent De La Calzada, Assistant Vice President & Head of Customer Relationship Management in Visayas and Mindanao nga na-post sa iPLDT website.
Ang dugay na nga panagtambayayong sa PLDT Enterprise ug sa LGU sa Cebu City dugay nang nakapahimo sa digital nga pagbag-o sa Siyudad nga nakabenepisyo sa mga residente pinaagi sa pagtabang kanila nga makasinati sa digital lifestyles uban sa kabag-ohan sa negusyo, edukasyon, banking, agrikultura, ug uban pa.
Kini nga suporta naghulagway sa padayon nga paningkamot sa PLDT ug Smart sa paghatag og koneksyon sa mas daghang siyudad ug pagtabang nila nga makab-ot ang digital transformation pinaagi sa integrated fixed ug wireless networks sa PLDT ug Smart.
Kini nga mga inisyatibo nahiuyon usab sa mga focus area nga gimando sa Private Sector Advisory Council (PSAC) sa kagamhanan bahin sa digital infrastructure pillar, labi na sa paspas nga paglusad sa imprastraktura sa internet.
Dason sa post sa website, nakatampo usab kini sa mga paningkamot sa PLDT Group nga mahatagan og koneksyon ang tanan ug angkla sa mga inisyatiba sa United Nations Sustainable Development Goals (UNSDG). (RJM,RRM)