ORMOC CITY, Leyte - Nasikop sa kapulisan sa Ormoc City ang usa ka babaye nga senior citizen nga nagdala og mga armas.
Si Police Colonel Armel Gongona, direktor sa Ormoc City Police Office (OCPO), niila sa suspek nga si Janet Bernabe, 61, taga San Antonio Village, Matina, Davao City.
Ang suspek padung na unta mo sakay og bus gikan sa terminal sa Ormoc paingon sa Davao, alas 8 pasado sa gabii, Sabado, Hulyo 6, 2019.
Apan atol sa inspeksyon sa taga-Civil Security Unit (CSU) sa mga naglinya nga pasahero, nakit-an ang dala niini nga walo ka armas nga giputos pa og newspaper.
"SOP naman kasi yun kasi may consented search naman po para sa mga pasahero," matod ni Gongona.
Nitawag sa kapulisan ang CSU ug dali kini nga narespondihan sa kapulisan.
Mismo si Col. Gongona ang niuban sa pagsusi sa maong suspek nga gi-hold sa terminal.
Gidala kini sa Police Station 1 ug giimbestigar sa kapulisan diin nakuha gikan kaniya ang 2 ka kalibre .38 revolver; 5 ka kalibre .45 ug 1 ka kalibre .9mm.
Matod ni Col. Gongona, misugilon kanila ang suspek nga igo lang siya gisugo sa pagkuha sa mga armas sa Danao sa Cebu.
"Ipa forensic pa natin yung cellphone niya sa cyber crime para malaman natin kung sino nag utos sa kanya" matud ni Gongona.
Matod ni Col. Gongona, mitug-an usab kanila ang suspek nga makatulo na kahigayon nga nihimo siya sa maong trabaho diin mokita siya og P500 matag armas.
Ang suspek ni-biyahe gikan sa Davao, miiagi sa Cagayan De Oro padung na sa Cebu.
Human sa pagkuha sa armas, nisakay kini og RoRo sa may Bogo paingon sa Palompon, Leyte ug Palompon paingon na usab sa Ormoc.
"Very casual siya. Kaya ako nagtataka kung mahigpit sila, hindi dapat nakakalusot," matod ni Gongona.
Kasong kalapasan sa Republic Act 10591 o Comprehensive Firearms and Ammunition Law. (Superbalita Cebu)