Namatay sa tambalanan sa Lunes sa buntag, Septiyembre 25, 2023, ang usa ka 78 anyos nga lolo nga gibunalan og pala sa iyang 45-anyos nga pag-umangkon nga giingong wa sa maayong pangisip.
Tungod sa hitabo sa mga alas 6 sa buntag sa Lunes, nagubot ang pipila ka mga lumolupyo sa Purok Cawayan, Barangay Basak, Compostela, amihana’ng Sugbo.
Ang biktima giilang si Ernesto Bitoon, 78, minyo samtang ang suspek mao si Efren Bitoon, 45.
Sa pagkighinabi sa Supebalita Cebu kang Police Capt. Lino Tryss Galvan III, nahibaw-an nga si Ernesto nikanaug sa iyang payag aron pagtubag sa sugo sa lawas.
Apan kalit nga nitumaw si Efren nga nagdala og pala nga hait ang ngilit, way daghang estorya, iyang gibunalan ang biktima nga way igong hinungdan. Naigo ang biktima sa ulo ug kamot.
Ang biktima daling gidala sa Danao City Provincial Hospital apan wala magdugay, namatay.
Samtang ang suspek nga nadakpan, gihulagway ni Galvan nga wild kaayo. Usa sa mga polis kaduha nasikaran ang itlog samtang ang kauban nga nitabang gilud-an ni Efren sa nawong
Nagduda sila nga duna kini deperensya sa pangisip busa ila kini nga ipahiling og doktor kon wa ba lang kini magpabuangbuang aron makalingkawas sa krimen.