Giaprobahan na sa konseho sa dakbayan sa Bacolod ang resolusyon nga naghangyo sa Land Transportation Office (LTO) ug sa Bacolod Traffic Authority Office (BTAO) nga pahugtan pa ang pagpatuman sa Anti-drunk and Drugged Driving Act of 2013 sa dakbayan.
Si Konsehal Claudio Puentevella, kinsa maoy nagsulat sa resolusyon, niingon nga daghang makamatay nga aksidente sa kadalanan ug disgrasya ang nahitabo sa dakbayan sa Bacolod nga naglambigit sa mga drayber nga ubos sa impluwensya sa alkohol ug uban pang mga butang nga makadaot sa kaluwasan sa kinatibuk-ang publiko ug gikonsiderar nga peligro sa katawhan.
Matod niya nga ang hugot nga pagpatuman sa Anti-Drunk and Drugged Driving Act manalipod sa mga lumolupyo sa Bacolod batok sa mga badlungon ug iresponsableng mga drayber nga ubos sa impluwensya sa alkohol ug uban pang gidili nga mga butang.
Si Puentevella, chairperson sa City Council committee on health, niingon nga ang Section 5 sa Article II sa 1987 Philippine Constitution naglatid nga ang pagmintinar sa kalinaw ug kahusay, pagpanalipod sa kinabuhi, kagawasan, ug kabtangan, ug ang pagpasiugda sa kinatibuk-ang kaayohan mao ang mahinungdanon alang sa pagtagamtam sa tanang katawhan sa mga panalangin sa demokrasya.
Matod ni Puentevella nga ang Section 5 sa Republic Act (RA) No. 10568 o ang Anti-drunk and Drugged Driving Act of 2013 nag-ingon nga supak sa balaod ang bisan kinsang tawo nga magmaneho og motorsiklo samtang anaa sa impluwensya sa alkohol, delikadong drugas ug/o ubang susama nga mga ilegal nga substance. (TPM sa SunStar Philippines)