Ang mga lisensya sa mga driver nga na-expire niadtong Abril 3, 2023 magpabiling balido hangtod Abril 2, 2024 o hangtod nga ma-release ang bag-ong plastic card, matod sa Land Transportation Office (LTO).
Ang hepe sa LTO nga si Assistant Secretary Attorney Vigor Mendoza II niisyo sa memorandum, pinetsahan og Septiyembre 6, 2023, nga nagmando sa tanang regional directors ug heads sa district offices sa ahensya nga ipatuman ang extension hangtod Abril 2, 2024, “or until such time availability of plastic cards is sufficient, which will be the subject of a separate memorandum.”
Ubos sa memorandum, wala’y koleksyon sa mga silot alang sa mga lisensya nga adunay gilugwaya’ng balido.
Kon ang tag-iya mag-renew sa iyang lisensya, markahan sa LTO personnel ang system generated driver’s license official receipt nga “Valid as Temporary Driver’s License Until Plastic Card is Released,” lakip ang mosunod nga mga detalye:
* Ang ngalan sa nag-isyu nga opisina, contact personnel/mobile phone number/email address;
* Ang ngalan ug pirma sa nagpagawas nga opisyal;
* Usa ka screenshot sa driver’s license card sa kliyente (atubangan ug likod) nga giimprinta sa luyo sa opisyal nga resibo.
Ang kard sa lisensya ibalik sa tag-iya niini.
Matod ni Mendoza nga padayon sila nga nakigtambayayong sa Department of Transportation (DOTr) aron matubag ang mga backlog, nga tungod sa kakuwang sa plastic cards.
Sa tinguha nga matubag ang mga kakuwang, ang DOTr sa sayo pa mimando sa pagpalit og lima ka milyon ka mga plastic card.
“Patuloy na gumagawa ng paraan ang inyong DOTr at ang inyong LTO upang matugunan sa lalong madaling panahon ang ating kinakaharap na hamon ukol sa driver’s license. Makakasa ang ating mga kababayang motorista na sa mga action plan na ito, laging isinasa-alang-alang ang inyong kapakanan,” matod ni Mendoza. (TPM sa SunStar Philippines)