KALIPAY ang nasinati sa mga official sa duha ka mga barangay sa Dakbayan sa Sugbo atol sa Valentine's Day human sila gihatagan og tag P100,000 sa Cebu City Hall tungod sa "maayong performance" sa ilang Barangay Anti-Drug Abuse Council (BADAC).
Ang Barangay Mabini ug Sapangdaku apil sa "best performing" Badac sa siyudad base sa evaluation nga gipahigayon sa Cebu Office for Substance Abuse Prevention (Cosap).
Base sa taho sa Cebu City News and Information, news portal sa lokal nga kagamhanan sa Dakbayan sa Sugbo, ang duha ka mga barangay nalakip sa 10 nga ilang nakita nga aktibo sa kampanya batok sa ilegal nga drugas.
Matod ni Cosap head Jonah John Rodriguez, ang P100,000 ilang pahalipay sa mga barangay kay naningkamot sa ilang kampanya nga ma drug cleared ang ilang barangay.
Ang gibasehan sa Cosap sa pag-ila sa barangays nga maayo og performance: aktibo ang Badac, gipatuman ang community-based drug rehab program ug pagka drug-cleared. Ang drug-cleared ug drug-free barangay dunay kalainan.
“’Drug-free’ is impossible since all barangays are affected by drugs while ‘drug-cleared’ (means) naay presence of drug personalities however dunay gibuhat ang barangay together with Cosap, PDEA (Philippine Drug Enforcement Agency), PNP (Philippine National Police) and DILG (Department of Interior and Local Government) nga interventions or programs for drug personalities, like our Community-based Drug Rehab Program,” kutlo kang Rodriguez.
Ang laing barangays nga maayo og performance apan hataganan pa mao ang Basak Pardo, Luz, Parian, Sto. Niño, Sudlon 1, Sudlon 2, ug Toong. Ang Sudlon 1, Sudlon 2 ug Toong pulos mga bukirang barangay.
Ang Luz wa pa matumbok nga drug cleared, matod sa samang taho.
Nidawat sa P100,000 nga tseke sa Sapangdaku mao si Barangay Kapitan Jovito Ladrazo samtang sa Mabini mao si Barangay Kapitan Richard Adolfo.
Matod ni Adolfo nga ang Mabini dunay 30 ka drug surrenderees nga ilang nasubay ug gipatawag aron mangundang na.
Samtang ang Sapangdaku nakaila sa ilang drug personalities human sila hatagi og listahan sa PDEA ug kapulisan.
Ang barangays mao ang nag-monitor kanila ug kanunay silang ipailawom sa drug testing.