Usa ka inahan ug iyang anak nga babaye gipangdakop sa airport sa Manila niadtong Septiyembre 27, 2023 tungod sa pagdala sa nasod og 14,360 gramos o P76.1 milyunes nga kantidad sa cocaine.
Ang mga suspek nga sila si Siti Aishah Binte Awang ug Nur Alaviyah Binte Hanaffe pulos mga Singaporean.
Na-intercept sila human niabot sakay sa Qatar airlines flight gikan sa Doha.
Si Bureau of Immigration (BI) Anti-Terrorist Group (ATG) Airport Head Bienvenido Castillo III niingon sa report ngadto kang BI Commissioner Norman Tansingco nga ang duha ka mga tigpayuhot og drugas ningsuway og transit sa Hong Kong agi sa Pilipinas dihang na-intercept sila sa mga awtoridad sa imigrasyon.
Nahitabo ang pagdakop human namatikdan ang kadudaha’ng mga pattern sa pagbiyahe gikan sa duha ka mga suspek.
“We received information about a suspect from international counterparts, and we observed that she would come in and out of the country in several instances and have noted suspicious travels,” kutlo kang Castillo sa usa ka pamahayag sa BI.
“We discovered another individual with the exact same patterns, hence we immediately coordinated the matter with the members of the Ninoy Aquino International Airport Drug Interdiction Task Group (NAIA-DITG),” dugang niya.
Mitabang usab sa operasyon ang mga sakop sa Bureau of Customs (BOC) ug Philippine Drug Enforcement Agency (PDEA), uban sa mga representante sa airline, matod sa BI.
Sa pag-inspeksyon sa mga iro, nasayran nga ang mga bagahe sa mga suspek adunay sulod nga kadudahang materyales.
Sa pagsusi sa mga personnel sa BOC, ilang nakuha ang unom ka cookie tin cans ug lima ka cylindrical chip cans nga adunay sulod nga 564 ka pellets nga adunay puti nga powdered substance.
Ang drugas, sa kaulahian giila nga cocaine, mikabat sa kapin o kulang 14,360 gramos nga adunay kasamtangang street value nga P76,108,000.
Gidayeg ni Tansingco ang BI-ATG alang sa “alerto ug proactive nga aksyon nga misangpot sa pagkasikop.”
“The alertness of our immigration personnel in analyzing travel patterns of these criminals was instrumental in this arrest...Close coordination among government agencies in our airports is necessary to protect our borders from all kinds of criminal activity,” matod niya.
Ang duha ka mga suspek gibutang sa kustodiya sa PDEA ug tukma nga kaso ang ipasaka batok kanila, matod sa BI. (LMY)