NAPASAKA na sa kapulisan ngadto sa korte sa dakbayan sa Danao ang mga kasong kriminal batok nila ni San Francisco Mayor Aly ug Vice Mayor Alfredo Arquillano Jr. niadtong Lunes sa buntag, Abril 8.
Ang mga sakop sa Cebu Provincial Police Office (CPPO) pinangulohan ni Police/Capt. Nazarino Emia, deputy chief sa Provincial Intelligence Branch (PIB), niduso sa mga impormasyon sa mga kasong kalapasan sa Republic Act 9516 kun illegal possession of explosives ug RA 10591 kun illegal possession of firearms and ammunitions batok sa magsuon.
Sa joint judicial affidavit sa mga arresting officer, nasayran nga usa ka magazine ug mga bala sa kalibre .45, mga bala sa 9mm, usa ka kalibre 22 rifle ug magazine, usa ka caliber AR-15 rifle ug magazine niini, 68 ka empty shells sa caliber 45, ug 50 ka empty shells sa caliber 45 ang nakuha gikan sa mga lawak nila ni Aly ug Al, samtang ang fragmentation hand grenade didto nakuha sa lawak sa mayor.
Kini dihang gironda ang ilang panimalay sa mga sakop sa PIB ug Provincial Drug Enforcement Unit (PDEU) sa Barangay Poblacion, San Francisco sayo sa buntag niadtong Abril 4.
Human madawat ang impormasyon sa mga kaso, si Jerry Dicdican, presiding judge sa Branch 25 sa Danao City RTC, ni-raffle niini ug didto kini nahipunta sa iyang sala.
Sila si Aly ug Al seryuso ang panagway dihang niatubang sa huwes pagka hapon sa samang adlaw dihang gidungog ang ilang ex-parte motion nga giduso ni retired judge Meinrado Paredes, lead counsel sa mga akusado ug Atty. Edmund Lao, abogado sa Barug Alang sa Kauswagan ug Demokrasya (Bakud) party diin sila mga miyembro.
Atol sa hearing sa mosyon, giuyonan ni Dicdican ang hangyo sa mga abogado nga tugotan ang mga akusado nga mabilanggo sa Danao City Jail nga gidumala sa Bureau of Jail Management and Penology (BJMP).
Si Lao nipasabot nga inay sa Cebu Provincial Detention and Rehabilitation Center (CPDRC), mas praktikal, dili dako ang magasto ug paspas ang pagdumala sa hustisya sa mga akusado kon sa Danao City Jail bilangguon ang ilang mga kliyente.
Sa hearing, si Dicdican niingon nga nasayod kini sa impormasyon base sa gipahibawo sa usa sa mga jail officer sa CPDRC nga dili na sila modawat og mga bilanggo sa kasamtangan. Gani ang ubang mga bilanggo adto gipangpriso sa mga local government unit diin giingong nahitabo ang krimen, bisan sa commitment order nga giisyu sa mga korte. (SCG)