Ang Cebu City Council niaprubar sa resolusyon sa pagsagop sa magtiayong retired Major General Melquiades ug Mia Feliciano tungod sa ilang dakong natampo sa pagpakigbatok sa coronavirus disease (Covid-19) sa Dakbayan sa Sugbo.
Sila si Konsehal Joel Garganera ug Association of Barangay Councils (ABC) president Franklyn Ong niduso og resolusyon sa pag-adopt sa magtiayong Feliciano.
Ang resolusyon gipasar sa tibuok Konseho niadtong Miyerkules, Nobiyembre 18, 2020.
Ang retiradong heneral, kinsa chief implementer sa Inter-Agency Task Force (IATF) sa Visayas, maoy nangu sa kombate batok sa Covid-19 sugod niadtong Hunyo dihang nikalit lang og abot og 5,000 ang mga kaso ug 397 na ang nangamatay sa dakbayan.
Si Mia, usa ka registered nurse ug adunay extensive clinical background sa United States, nipaambit sa iyang kaalam matag higayon nga adunay mga meeting nga ipahigayon ang Emergency Operation Center (EOC) para pagkontrolar sa pagkuyanap sa virus.
Si Garganera nagkanayon nga bisan di lumad sa dakbayan sa Sugbo ang magtiayon, apan ilang gisakripisyo ug gisugal ang ilang kinabuhi taliwa sa hulga sa virus matabangan lang ang Cebu City.
“The spouses Feliciano have worked day and night , without any weekends or holidays in order to provide the most immediate needs and establishing an improved system for the City’s Covid-19 response.” matod sa resolusyon. / PAC