Bana namatay samtang asawa kritikal human sila nadasmagan sa usa ka sakyanan samtang nagsakay sa ilang motorsiklo alas 9:30 sa gabii sa Biyernes, Mayo 5, 2023 sa Brgy. Taloot, lungsod sa Argao.
Ang biktima nga patay nang niabot sa ospital sa lungsod sa Argao giilang si Ronald D. Gimena, minyo, taga St. Francis St., Brgy. Buhisan, dakbayan sa Sugbo.
Naa sa kritikal nga kahimtang ang iyang asawa nga si Ruby Ann, 37.
Gitanggong sa Argao Police Station si Harry Camasura Jacosalem, 31, minyo, negusyante, taga Brgy. Simala, lungsod sa Sibonga, Cebu.
Siya maoy nagmaneho sa Toyota Avanza nga nakadasmag.
Si Police Major Andy Michael Roque, hepe sa Argao Police Station nga nahinabi sa Superbalita Cebu, nagkanayon nga si Jacosalem gikan sa lungsod sa Argao.
Gihulagway ni Roque nga "nakainom" nga nagmaniho sa iyang sakyanan si Jacosalem nga padulong mopauli sa Sibonga.
Matod ni Roque nga sa ilang imbestigasyon, si Jacosalem niingon nga siya nakatagpilaw samtang nagmaniho.
Kini ang hinungdan nga siya nisulod sa pikas lane sa karsada ug gikasugat ang magtiayon nga nagmotorsiklo.
Ang magtiayong Gimena gikan sa dakbayan sa Sugbo paingon sa Langtad, Argao.
Sa kakusog sa impact, nangalagpot ang mga biktima nga daling gidala sa Argao Rescue Team ngadto sa Isidro C. Kintanar Memorial Hospital (ICKMH).
Apan ang bana patay nang niabot samtang ang asawa kritikal.
Si Jacosalem pabilin pang gitanggong sa pagsuwat ning taho ug giandam ang tukmang kaso batok kaniya. (GPL)