Wala mahinayon ang gikatakda nga pag-abli sa labing bag-o nga rota gikan sa mainland Cebu paingon sa lungsod sa Poro, mga isla sa Camotes sa Huwebes, Abril 20, 2023.
Si Eric Lim, labing taas nga opisyal sa Topline, operator sa Pier 88 sa Liloan, nagkanayon nga dili pa andam ang pier kay kinahanglang paladman aron makadunggo kay dagko ang roro vessel sa Super Shuttle Ferry (SSF).
Ang barko sa SSF maoy mohakot sa mga pasahero ug mga kargamento lakip na ang mga trak ug bus, paingon ug gikan sa Camotes agi sa lungsod sa Poro.
Si Lim, kinsa nakigtagbo kang Cebu Governor Garcia sa Miyerkules, Abril 19, 2023, nihangyo nga lugwayan og upat ka semana ang maiden voyage sanglit kinahanglan pa silang mohimo og dredging activities sa tulo ka berthing spaces alang sa roro vessels.
Ang gobernador niingon nga ang pag-abli sa maong rota sa katapusan sa Mayo o sa sayong bahin sa Hunyo ulahi na kaayo alang sa summer vacation diin ang mga lokal ug langyaw nga turista modagsa sa Camotes Islands alang sa mga fiesta ug bakasyon.
Gikasubo sa gobernador ang sitwasyon tungod kay ang interest sa Camotes grabe ka in-demand hilabi nga bag-ohay lang nahuman ang Camotes leg sa Suroy-Suroy Sugbo package nga gipasiugdahan ni Garcia.
Ang bag-ong biyahe sa barko gikan sa Liloan paingon sa Camotes maoy gipanglantawan nga makapakusog sa pagdagsa sa mga turista sa mga lungsod sa Camotes ug sayon na lang ang pagbiyahe gikan ug paingon sa maong isla.
Si Garcia gusto nga mapun-an ang biyahe sa mga barko gikan sa Cebu paingon sa Camotes.