Gawas sa posibilidad nga i-disqualify sa Commission on Elections (Comelec) gikan sa pagdagan sa Oktubre 30 nga Barangay and Sangguniang Kabataan Elections (BSKE), ang mga kandidato nga manubag kay mapamatud-an sa pag-apil sa premature campaigning, mahimong mag-atubang sa mga kaso nga kriminal.
Sa usa ka interbyu, si Comelec Spokesman John Rex Laudiangco niingon nga kadtong mamatud-an nga sad-an sa premature campaigning mahimo usab nga pasakaan og mga kaso sa election offense, nga adunay silot nga pagkabilanggo.
“If the decision really of the Division and the Commission en banc is to disqualify, most probably, we can also establish that it is an election offense because of the violation of Section 80 (of the Omnibus Election Code),” matod ni Laudiangco.
“In the ruling, in its dispositive portion, there will likely be a directive to the Law Department to conduct a preliminary investigation. We will be determining if there is probable cause. And if there is, we will be filing the cases in the regional trial court. This will be a criminal case,” dugang niya.
Gipasabot ni Laudiangco nga ang pagdiskwalipika sa eleksyon karong Oktubre 30 mao lamang ang administratibong aspeto sa kalapasan.
Sa laing bahin, siya miingon nga ang kaso sa election offense, nga adunay silot nga usa ngadto sa unom ka tuig nga pagkabilanggo, tangtangan sa katungod sa pagboto, ug perpetual disqualification sa paghupot sa pampublikong katungdanan, alang sa kriminal nga aspeto.
“There will be two impacts: the administrative case, which is the disqualification, and criminal case, which is the election offense,” matod sa poll official.
Giluwatan ni Laudiangco ang maong pamahayag human ang Comelec-Task Force Anti-Epal misang-at og Petitions for Disqualification batok sa pasiunang 35 ka mga kandidato sa BSKE.
Ang Petitions for Disqualification gibase sa mga paglapas sa Section 80, nga mao ang premature campaigning o ang aksyon sa pagpangampanya nga gihimo gawas sa campaign period.
Gidili gihapon ang mga kalihukan sa eleksyon hangtod sa Oktubre 18 tungod kay ang BSKE campaign period magsugod lang sa Oktubre 19. / HDT sa SunStar Philippines