Nimando si Presidente Ferdinand “Bongbong” Marcos Jr. niadtong Miyerkules, Oktubre 26, 2022, sa koordinasyon sa mga hingtungdang ahensya sa gobyerno human sa magnitude 6.4 nga linog nga miigo sa Abra niadtong Martes sa gabii.
Si Marcos niingon nga ang Department of Public Works and Highways (DPW) nagsusi na sa mga karsada ug mga edipisyo alang sa posibleng kadaot, samtang ang Department of Energy nag-atubang sa mga pagkawala sa kuryente sa mga apektadong lugar.
Matod niya nga ang Department of Social Welfare and Development maoy nagdumala sa relief operations, samtang ang Department of the Interior and Local Government maoy nag-monitor sa sitwasyon sa yuta.
“Everyone is advised to keep out of tall structures,” matod ni Marcos. “Mag iingat tayo mga kababayan. Dadating na o papunta na kami para tumulong,” dugang niya sa Ilokano.
Sa interbyu sa radyo, si Abra Provincial Disaster Risk Reduction and Management Office officer-in-charge Arnel Valdez niingon nga 10 ka tawo gikan sa mga lungsod sa Lagayan, San Quintin ug San Juan ang gikataho nga naangol sa linog.
Siya niingon nga daghang mga estraktura sama sa Nuestra Señora de la Paz Parish Church sa lungsod sa La Paz ug mga municipal hall ang naguba tungod sa linog.
Matod niya nga ang simbahan gideklarar na nga off limits sa publiko. Gideklarar usab nga suspendido ang mga klase ug trabaho sa gobyerno.
Matod ni Valdez nga adunay nahitabong pagdahili sa yuta sa Abra-Kalinga road, Abra-Ilocos Norte road, ingon man sa Tubo, Abra.
Matod niya nga pipila ka mga residente mipili sa pagkampo atubangan sa ilang mga balay human sa linog aron masiguro ang ilang kaluwasan.
Sa Ilocos Norte, ang Mariano Marcos Memorial Hospital and Medical Center sa Batac City nakaangkon usab og dakong kadaot human nahulog ang usa ka bahin sa atop sa isolation intensive care unit.
Gilayon naman nga gipabakwit ang mga pasyente ug way naangol sa insidente.
Matod sa Ilocos Norte Police Provincial Office nga temporaryong gisirad-an ang Pinili-Nueva Era Road ug Barani-Quiaoit Bridge tungod sa clearing operations nunot sa pagdahili sa yuta atol sa linog. (TPM sa SunStar Philippines)