Si Presidente Ferdinand “Bongbong” Marcos Jr. niingon sa Miyerkules, Oktubre 26, 2022, nga dili siya kombinsido nga ang New Bilibid Prison (NBP) detainee nga giingong maoy middleman sa pagpatay sa radio broadcaster nga si Percy Lapid (tinuod nga ngalan Percival Mabasa) namatay tungod sa natural nga hinungdan.
Kini bisan kon way timailhan sa foul play sa iyang kamatayon.
“The toxicology report came back, mukha talagang walang lason o gamot na ibinigay sa namatay but I’m still not satisfied that it was natural causes... because there are ways to kill a person that would not show up in the medico-legal so tuloy-tuloy pa ang imbestigasyon,” matod ni Marcos sa interview sa mga reporter.
Taliwala sa mga pagsaway nga siya nagpakahilom sa mga kaso, si Marcos miingon nga siya nag-monitor sa kalamboan niini ug hugot nga nakig-alayon nila Justice Secretary Jesus Crispin Remulla ug Interior Secretary Benhur Abalos Jr.
Matod ni Marcos nga ang iyang mando alang sa kapulisan ug uban pang mga ahensya nga nag-imbestigar sa pagsusi pag-ayo sa kaso ug pag-ila sa utok sa pagpatay kang Lapid.
“But more importantly is to really trace saan nanggaling ito? Who gave the order? Sino nagbigay doon sa preso na orderin ang shooter na gawin ito at bakit? That is what we are working on now,” siya nagkanayon.
Si Lapid gipusil-patay niadtong Oktubre 3 sa gabii samtang nagpauli sa Las Piñas City.
Niadtong Oktubre 17, ni-surrender sa kapulisan si Joel Escorial, ang miangkon nga gunman.
Gianunsyo ni Abalos ang pagsurender ni Escorial atol sa press briefing niadtong Oktubre 18.
Giila ni Escorial ang tulo niya ka kauban nga sila si Edmon ug Israel Dimaculangan ug usa ka Orly.
Matod pa niya nga gikan sa sulod sa NBP ang kill order batok kang Lapid.
Niadtong Oktubre 20, gianunsyo ni Remulla nga ang giingong middleman nga si Jun Villamor, nga gitumbok ni Escorial, namatay sa NBP pipila ka oras human nipublikar si Escorial niadtong Oktubre 18.
Positibo siyang giila ni Escorial pinaagi sa mga litrato. (TPM sa SunStar Philippines)