DUHA ka mga managsuon nga nag-operate og massage parlors sa dakbayan sa Sugbo ug Talisay, lakip na ang ilang duha ka mga receptionist, gipangdakop niadtong Biyernes, Abril 1, 2022, sa dihang naaktuhan nga ilang gipugos ang ilang masahista nga makighilawas sa ilang mga kustomer.
Mga sakop sa National Bureau of Investigation (NBI7), inabagan sa Inter-Agency Council Against Trafficking (IACAT) ug Department of Social Welfare and Development (DSWD), maoy hiniusang nangronda.
Si NBI 7 Director, Atty. Rennan Augustus Oliva, niila sa mga dinakpan nga sila si: Mark Rhayan Bilocura, 24, tag-iya sa Mc Shield Massage Spa; ug igsuon niini nga si John Loyd, 19, nga maoy manager.
Lakip nga gidakop ang receptionists nga sila si Jessica Jane Alonzo, 24, ug Marisol Topacio, 19.
GI-RESCUE
Naluwas sab sa mga operatiba ang 11 ka mga masahista, duha kanila mga lalaki.
Saysay ni Oliva nga ilang gipahigayon ang entrapment ug rescue operations sa dihang nakadawat sila og tip nga ang massage parlor sa mga managsuong Belicora gikatahong ningpugos sa ilang mga masahista nga motanyag og sexual services ngadto sa ilang mga suki.
Sa wa pa ang operasyon, ang NBI nipahigayon og verification sa maong massage parlors, ilabi na sa ilang sangang establisemento nga nahimutang sa Barangay Tabunok, Talisay City ug Barangay Labangon, Cebu City.
Sigun pa sa mga biktima nga sa wa pa sila nadawat sa maong trabaho, makighilawas una sila kang Mark.
Sa higayon nga madawat na sa trabaho, motanyag sila og “special service” ngadto sa ilang mga kliyente gawas sa regular nga massage services.
Tug-an ni Oliva nga ang operasyon sa maong massage spa nigamit sa social media platforms sama sa Facebook aron makaagni og dugang kustomer.
Lakip na ang packages ug special services ang gi-post sa social media diin makahigayon og pili ang mga kustomer.
SPECIAL MENU
Gitug-an sab ni Oliva nga gawas sa regular massage services , nagtanyag ang maong massage spa og “special menu” ngadto sa mga interesado nga kliyente.
Ang maong menu naglakip sa pakig-sex ngadto sa masahista nga ilang mapilian.
Ang ‘special services’ nagkantidad gikan sa P1,299 sud sa usa ka oras ug 10 minutos nga serbisyo, adunay P1,499 – usa ug tunga sa oras ug P1,799 sud sa duha ka oras.
“Depende sa imong preference if you pay for the special package, you have the option to choose your preferred therapist,” sigun pa ni Oliva.
Ang maong massage parlor nagsugod sa pag-operate niadtong Mayo 2021.
Ang mga dinakpan kasamtangan nga gi-detain sa NBI 7 ug hayan pasakaan og kasong large scale qualified trafficking nga way piyansa.
Samtang ang mga masahista nga na-rescue gi-turn over ngadto sa DSWD.