Calbayog City, Samar--Si Mayor Ronaldo Aquino, iyang duha ka police escorts ug usa sa mga gunman nga nang-ambush nangamatay sa pinusilay pasado alas 5 sa hapon, Marso 8, 2021.
Ang sakyanan ni Aquino, mayor sa Calbayog City, girakrakan sa ilang pag-abot sa Laboyao Bridge, Barangay Lonoy ning siyudad.
Matod sa post sa Philippine Information Agency (PIA) 8 nga usa sa napatay si Aquino.
Wa pa nganli ang duha ka police escorts samtang laing kauban sa mayor gidala pa sa tambalanan ning pagsuwat.
Base sa police report, si Aquino ug tulo ka kaubanan sakay sa usa ka Toyota Hi Ace van paingon sa norte.
Sa ilang pag-abot sa Laboyao Bridge, duha ka sakyanan nga sakay ang armadong mga tawo.
Diretso kining nipaarak sa sakyanan sa mayor ug nahitabo ang pinusilay tali sa mga escort sa mayor.
Napatay ang usa sa mga suspek sa pinusilay.
Usa ka kasaligang tinubdan sa Superbalita Cebu gikan sa kapulisan ang nisulti nga ang usa ka suspek kay pulis.
Gisuwayan og pangayo sa Superbalita Cebu og reaksyon si Police Lieutenant Colonel Ma. Bella Rentuaya, spokesperson sa Police Regional Office (PRO) 8, apan siya niingon nga wala pa siyay impormasyon ug nagpadayun pa ang imbestigasyon.
Ang kapulisan sa mga duol nga lugar nag establisar og checkpoint.
Pipila ka adlaw una pa ang hitabo, pipila ka lugar sa Calbayog dunay nakapaskin nga poster nga dunay blangko nga dagway ug naay nakasuwat nga “wanted next mayor.” Usa sa gitan-aw usab karon sa kapulisan ang kalambigitan sa pulitika. Wa pa mo hatag og opisyal nga pamahayag ang kagamhanan ug pamilya sa mayor. (JKDP)