Ang Metropolitan Cebu Water District (MCWD) niawhag sa JFAP Construction/ Optimus Engineering and Construction sa pagpaspas sa ilang trabaho sa P115 milyon nga kontrata sa paglubong sa 487 ka higanteng tubo gikan sa Barangay Busay paingon sa JY Square sa Barangay Lahug, Nobiyembre 30, 2022.
Si acting General Manager Edgar Donoso sa MCWD nisuwat ngadto kang Engr. Joseph Frederick Pepito, authorized managing officer sa JFAP Construction/ Optimus Engineering and Contruction Joint Venture, sanglit ang water district naglantaw nga mahuman na ang maong proyekto sa Disyembre 4 para makapaagas na sila og tubig paingon sa kabalayan.
Si Donoso nagkanayon nga ang maong proyekto nga gisugdan niadtong Nobiyembre 2021 ug niadto ra untang Agusto 22,2022 mahuman ang maong proyekto.
“However, considering that the completion of the works could not be achieved within that time frame, it was promised to and impressed upon the Water District that your company shall complete the works on or before December 4, 2022,” tipik sa suwat ni Donoso.
Gawas sa paghuman sa P115 million project, matod pa sa MCWD nga kinahanglan usab nga ibalik sa contractor ngadto sa original ang karsada nga ilang giguba gumikan sa paglubong sa mga tubo aron dili peligro alang sa mga motorista.
“Accordingly, please ensure hat the project will not be delayed any further,” dugang ni Donoso.
Si Rene Borromeo, member sa Cebu City Traffic Management Board, nagkanayon nga gipatawag sa board ang representante sa JFAP nga si Engr. Rene Chambal ug Project Engr. Gab Villanueva aron pangayuan sa ilang kongreto nga plano para maminosan ang impact sa traffic congestion sa lugar diin gipahigayon ang proyekto.
Si Borromeo nagkanayon nga ang gipasalig sa JFAP mao nga niadtong Nobiyembre 26, kumpleto na ang road restoration gikan sa Lobrigat property diin nahimutang ang duha ka modular tanks paingon sa City Lights, November 26 gikan sa Mercedes Benz paingon sa Lahug Market, Nobiyembre 29 gikan sa Marco Polo paingon sa Mercedes Benz, December 8 gikan sa City Lights ngadto sa Marco Polo hotel.
Apan matod pa ni Borromeo kinsa nakasubay sa maong karsada, wala pa matuman sa contractor ang ilang mga saad base sa petsa nga ilang gihatag ngadto sa Board apan iyang gihulagway nga padayon kining nagtrabaho.