Naghulat karon ang Metropolitan Cebu Water District (MCWD) sa pagtugot gikan sa Local Water Utilities Administration (LWUA) aron mapatuman ang 60 porsiyento nga umento sa tubig sa dili pa ang Hulyo 1, 2023.
Bisan pa sa nagsingabot nga pagsaka sa presyo, ang government-owned utility provider niingon nga ang water district nagtanyag gihapon sa labing baratong bayranan sa tibuok nasod.
Si MCWD Corporate Planning Department acting manager Engr. John Macabinta miingon atol sa “Kapihan sa PIA” (Public Information Agency) niadtong Miyerkules, Marso 15, 2023, nga ang epekto sa umento sa taripa “minimal and reasonable” lamang ngadto sa mga konsumidor.
Matod ni Macabinta nga ang gibanabana nga pagsaka sa bayranan matag panimalay mokabat lang sa P80-P180 matag buwan depende sa rate sa konsumo.
Sa pagkakaron, ang MCWD naningil og P15.20 matag cubic meter sa unang 10 ka cubic meters sa usa ka buwan.
Matod ni Macabinta nga ang gisugyot nga usbaw mapaigo na sa mga galastuhan sa nagpadayon nga mga proyekto sa MCWD ug mga kontrata nga gipirmahan alang sa umaabot nga mga proyekto nga makatabang sa pagpalambo sa serbisyo sa water district.
Dugang pa niya nga ang MCWD wala mopaumento sa ilang taripa sa tubig sulod sa pito ka tuig busa nanghinaot sila nga aprobahan sa LWUA ang ilang hangyo.