Menor nga ‘vandal’ wa pasayloa ni Chan

Tungod kay makadaghan na niya buhata, wa na pasayloa sa mayor sa dakbayan sa Lapu-Lapu ang lalaking menor nga giingong ni-vandal na sab sa laing mga dapit sa siyudad.

Si Mayor Junard “Ahong” Chan, sa interbyu sa mga tigbalita sa Lunes, Mayo 8, 2023, niingon nga makatulo na ka mga higayon nga nasakpan nang vandal ang menor sa lainlaing mga dapit sa siyudad.

Tungod sa kadaghan sa iyang mga pagbulingbuling sa mga paril, mokabat sa P67,000 ang kinatibuk-ang mamulta sa iyang pamilya kon pasakaan na siya og kaso sa Siyudad human nimando si Chan sa city legal office.

Matod niya nga kinahanglan nga pasakaan og kaso “aron madisiplina ang maong bata.”

Si Kim (di tinuod niyang ngan), nahasulod na makaduha ka mga higayon sa Home Care sa Brgy. Gun-ob, una niadtong Abril.

Community service lang ang gipahamtang nga silot batok kaniya, apan sa iyang gibuhat sa Lunes, Mayo 8, di na makapasaylo si Chan kaniya.

WA MOTAGAM

Si Kim nasakpan human ang giingong usa sa iyang gi-vandal nga paril sa Mepz 1 sa Brgy. Pusok gi-post sa social media page ni Chan.

Usa sa iyang mga classmate nakakita ug ni-react sa post.

Daling ni-contact sa classmate ang administrador sa page sa mayor ug didto na gibutyag sa informant kon kinsa ang vandal.

“The informant even shared a post in the mayor’s page, of the vandal writing on the blackboard in their class, the same vandal phrase he allegedly committed,” matod sa usa ka pamahayag nga giluwatan sa Public Information Office (PIO) nga gipadala sa Superbalita Cebu sa Mayo 8.

Tungod sa gibuhat sa impormante, siya ang makadawat sa P30,000 nga gitanyag sa sayo pa sa mayor sa makatudlo sa nagbulingbuling sa paril.

Ang inahan ni Kim nga nikuyog kaniya sa pag-adto sa buhatan ni Chan, nisuway sa paghangyo ug pagpasabot sa mayor, apan wa na madala pa ang mayor kay makadaghan na kini buhata.

Matod sa inahan, kinsang ngan gipugngan, nga si Kim mao ang kamaguwangan sa upat ka mga magsuon.

Didto kini nagdaku sa iyang apohan apan ilang gikuha ug gimatuto apan ilang nabantayan nga kini “badlungon.”

Nipasabot ang inahan nga wa sila nagkuwang sa pag-atiman ug pagmaymay kang Kim.

Sa pangutana kon diin siya’g kwarta gipalit og spray paint, si Kim niingon nga nagtigom siya aron makapalit.

NAHIMANGOD

Si Chan, sa iyang social media post sa Lunes, Mayo 8, nipadayag sa iyang kasagmuyo sa hitabo.

“Bag-o lang gyud napintalan og puti ang maong pader pero gihugawhugawan na pod. Wa na gyud ko kasabot kon unsay punto aning bandalista ug unsay benepisyo nga ilang makuha aning ilang paghugawhugaw,” matod sa mayor.

Nipasabot ang mayor nga tumong niya sa pagpanglimpyo sa mga dapit sa dakbayan, apil na ang pagpintal ug pagdibuho sa mga paril, mao ang pagpanindot sa siyudad isip destinasyon sa turismo.

Nahimutang sa siyudad ang dagkong mga hotel ug resorts nga nagtanyag og nga serbisyo sa lokal ug langyaw nga mga turista.

“Pero ang akong nahibaw-an ang punto sa atong paglimpyo ug pag-beautify sa atong siyudad kay para makaagni pa kita og turista ug nindot pod sa atong panan-aw ang atong palibot nga hangtod karon wa gyud nasabti niining mga badlungon sa katilingban,” dugang sa mayor. (uban kang FVQ)