MGA langyaw nga tigpuhunan o locators sa Mactan Export Zone (MEZ) 1 ang gikatahong nagplano nga mobalhin sa laing nasud sa Asya, subay sa plano sa Mactan Cebu International Airport (MCIA) sa pagtukod sa ikaduhang runway.
Sa usa ka joint petition sa Mactan Export Processing Zone Chamber of Exporters and Manufacturers ug ang Japanese Chamber of Commerce and Industry sa Sugbu ngadto sa MCIA niadtong Disyembre 13, 2019, mipadayag sila sa ilang kadismaya sa pasalig sa usa ka smart city, usa ka sugyot nga proyekto.
Ang petisyon nagkanayon nga duda ang mga tigpuhunan sa maong plano.
“An atmosphere of apprehension and disquiet has now prevailed among all the foreign investors in MEZ 1 to the extent that new investments of expansion capacities are put on hold and plans to relocate to other countries in Asia are already on the table,” matod sa petisyon.
Moabot ngadto sa 57,000 ka direct workers ug 285,000 indirect laborers ang giempleyo sa MEZ 1 pagkakaron.
Sa usa ka survey sa unom ka mga locators sa MEZ 1, nahibawan nga ang annual basis, payroll and benefits nga gibayad ngadto sa mga empleyado moabot ngadto sa P3.35 bilyones. Ang export a MEZ 1 moabot og P99 bilyones niadtong 2018. / JOB, FVQ