Aron makasugod na sa pagbayad ang mga okupante sa mga luna sa 93-1 ug sa Alliance of Barangay Apas Community Associations Inc. (ABACA), sila gipa-enroll sa Home Development Mutual Fund o Pag-IBIG Fund aron maabagan ang pag proseso niini sa housing loan applications.
Kini maoy nasabutan atol sa tigom nga gipangulohan ni Cebu Governor Gwendolyn Garcia sa mga homeowner group sa Septiyembre 25 sa Kapitolyo.
Ubos sa binuwan nga paying terms sa Pag-IBIG Fund, mahimo’ng makuha sa homeowner associations ang mga luna sa Kapitolyo samtang ang ahensya na maoy mobayad sa kapitolyo sa fair market value niini.
Ang 93-1 Ordinance naglakip sa 51 ka ektaryang luna sa Probinsya sa dakbayan sa Sugbo sa Barangay Busay, Luz, Lahug, Mabolo, Apas, Lorega, Kasambagan, Capitol Site, Tejero ug Kalunasan nga sagad giokupahan sa mga residente sa syudad.
Subay sa lagda, mahimo lang nga makapuyo ang mga residente sa dakbayan sa Sugbo sa mga luna sa Kapitolyo kon makabayad na sa full amortization sa propriedad.
Gipahibawo sa Kapitolyo pinaagi sa Sugbo News, social media news platform sa buhatan sa gobernador, nga atol sa maong higayon, gipangulohan ni Pag-IBIG Visayas head Paulino Talacay ang pag facilitate sa enrollment sa mga homeowner group ngadto sa ahensya.