Mañanita sa nag birthday napakgang dihang ning-abot ang mga sakop sa Criminal Investigation Detection Group (CIDG) 7 nga ningronda sa Sabado sa buntag, Pebrero 26, sa duha ka mga balay sa dakbayan sa Carcar kay ang usa sa ilang target mao diay ang gimañanitahan.
Igo lang natapos ang pangadye sa painit nga giandam sa asawa dihang miabot ang mga pulis aron i-serve ang search warrant nga giluwatan ni Cebu City Regional Trial Court (RTC) Branch 24 Judge Jose Nathaniel Andal sa usa sa mga tag-iya sa balay.
Kini may labot sa kalapasan sa Republic Act 1591 kun Comprehensive Firearms and Ammunition Regulation Act.
Ang ronda gipangulohan ni Police Lieutenant Colonel Joey Caise uban ang mga operatiba sa Regional Intelligence Unit (RIU) 7, pasado alas 7:00 sa buntag sa Sityo Awayan, Barangay Poblacion, dakbayan sa Carcar, habagatang Sugbo.
Unang gironda ang panimay ni Nestor Navarro, 58.
Nakuha sa kapulisan ang 10 ka bala sa 9mm, usa ka bala sa .38 caliber revolver, 13 ka bala sa kalibre .45 nga pistola, walo ka buhing bala sa kalibre .380 nga pistola, usa ka magazine sa kalibre .45 nga pistola, kalibre .45 nga pistola, Ingram submachine pistol, silencer, holster, duha ka mga 5.56mm nga mga bala, usa ka magazine sa M16 Armalite rifle ug usa ka sling bag.
Sunod nga girumbo sa mga sakop sa CIDG 7 ug RIU 7 ang panimalay ni Roel Navarro, 53, manghod ni Nestor. Ang balay likod ra sa pinuy-anan sa iyang maguwang.
Nakuha gikan sa balay ni Roel mao ang usa ka kalibre .45 nga pistola nga way bala.
Si Roel niingon nga ang iyang armas alang sa depensa sa kaugalingon samtang si Nestor nakugang sa nakuha nga mga armas nga wa siya masayod kon diin gikan kay mga bala ra ang iyang gihuptan.
Nagduda si Nestor nga ang ilang maguwang maoy nagparonda kanila kay ilang gikasungi sa yuta.
Apan matod sa CIDG 7 nga way labot ang maguwang kay ang ilang tinubdan mao ang usa ka informant nga nisulti nga ang magsuon dunay mga armas.
NAKASAKMIT
Ubay-ubay nga mga armas ang nasakmit sa kapulisan sa dakbayan sa Carcar sa ilang kampanya batok sa kremin.
Si Police Lt. Col. Ardioleto Cabagnot, hepe sa Carcar Police Station nga nahinabi sa Superbalita Cebu, nagkanayon nga sila nakasakmit og 11 ka mga armas sa miaging semana.
Kabahin kini sa ilang sunodsunod nga mga operasyon batok sa mga kremin.