LUNGSOD sa San Fernando wa pay bisan usa ka barangay nga nadeklarar nga drug cleared kay di aktibo ang mga anti-drug abuse councils.
Hinuon gihulagway sa Cebu Provincial Anti-Drug Abuse Office nga “improving” ang performance sa municipal ADAC sa lungsod kon itandi niadtong 2015, ang tuig kanus-a gisugdan ang Sugbo Kontra Droga Program sa buhatan.
Dunay 21 ka mga barangay ang lungsod sa San Fernando, apan bisan usa wa pay drug-cleared.
Hinuon gitug-an ni CPADAO Executive Director Ivy Durano nga dunay lima ka mga barangay nga giendorso sa ilang opisina alang sa drug-clearing sa miaging tuig.
Apan matod ni Durano, wa pa kini makapasar sa mga assessment busa wa pa usab na-endorso ngadto sa Regional Oversight Committee, nga gipanguluhan sa Philippine Drug Enforcement Agency, nga mao sa’y pinal nga mo-desidir kon ideklarar kini nga drug-cleared o dili.
Sigun sa CPADAO ang kahuyang o ang di pagka-aktibo sa ADAC sa maong mga barangay hinungdan nga di kapasar sa drug-clearing assessment.
Gawas niini, giingong wala pa usab niini masustenir ang ilang mga anti-drug abuse program.
Hinay sab implementasyon sa kabarangayan sa community-based rehabilitation program (CBRP), diin 66 lang ang surrenderers nga nalista sa maong programa ug wa pay tataw nga nakahuman.
“Dili gyud ingon ana ka-active ang BADAC sa kining lima ka barangay. It still needs to be focused in terms of the functionality and effectivity of the Badac,” sigun ni Durano.
Sukwahi sa mga Badac, gihulagway ni Durano nga “improving” na hinuon ang performance sa municipal ADAC sa San Fernando tungod sa implementasyon niini sa nagkadaiyang anti-drug abuse programs, ilabi na sa demand reduction.