MGA namatay nga bombero sa nasod sa Lebanon human sa pagbuto sa mga eksplusibo sud sa dakong bodega, gihatagan og pagyukbo sa Cebu City Fire Station (CCFS) kagahapon, Agusto 9.
Si Fire Chief Insp. Josephus Alburo, city fire marshal sa CCFS, nimando ngadto sa tanang sub-fire station commanders sa pagpatingog sa ilang sirens sa firetrucks isip simbolo sa paghatag og katapusan nga pagsaludo sa kaubanang fire fighters sa Lebanon.
Untop alas 12 sa udto, ang tanang sub-fire stations sa siyudad mipalanog sa ilang mga siren sa tanang fire trucks.
Lakip na ang mga barangay fire brigade misimpatiya sa maong katapusan nga paghatag og pagsaludo sa mga bomberong Lebanese nga miresponde atol sa mibusikad nga bodega didto sa Lebanon.
Matod ni SFO2 Wendel Villanueva, tigpamaba sa CCFS, ang paghatag og tribute sa mga namatay nga bomberong Lebanese usa kini ka mahinungdanon tungod sa gipakita nga kabayanihan sa ilang trabaho.
Ang mga bomberong Lebanese miresponde sa dapit kon diin dunay mibusikad nga mga bomba sa usa ka bodega didto sa Lebanon apan lakip sila nga nangamatay.
Samtang atol sa mubo nga programa sa gihimong tribute sa mga sakop sa bombero sa Sugbo didto sa Parian Fire Station, si Alburo nipahimangno sa iyang mga sakop nga panahon sa pagtubag sa sunog mag-amping kanunay.
Dugang ni Alburo nga sa panahon sa pagtubag sa sunog labing unang tumong sa bombero ang pagpalong dayon sa miulbo nga kayo apan kinahanglang anaa kanunay sa luwas ang kaugalingon sa dili pa makigkumbate sa pagpalong sa kayo sa girespondihan nga alarma. (BBT)