Kon usa ka sa natanggong nga pasahero sa nakalabay nga mga adlaw kay wa kay masakyan nga bus, dunay tubag niini ang Land Transportation Franchising and Regulatory Board (LTFRB) 7.
Matod sa LTFRB, gi-drug test ug gipailawom sa refresher training ang mga driver sa Vallacar Transit Inc., operator sa Ceres Bus.
Subay usab niini, nakigtagbo na si LTFRB 7 Director Eduardo Montealto Jr., sa kadagkoan sa VTI aron hisgutan kini ug aron usab dili mabalda ang operasyon sa mga bus.
Si Montealto nagkanayon nga nagdungan sagad ang mga driver sa pagtambong sa refresher training ug gidungan usab ang drug test sa kompaniya.
Matod niya, mamahimo nga himuon ang maong rekisito unta sulod sa 30 ka adlaw aron di mabalda ang operasyon sa bus company ug di matanggong ang mga pasahero.
Kining lakang sa kagamhanan gihimo human nalambigit sa mayoriya sa mga aksidente sa bus ang Ceres buses.
Sa mao nga mga aksidente sa Metro Cebu ning nakalabay nga mga tulo ka semana, upat ka mga kinabuhi ang nangakutlo.
Ang labing grabe mao ang panagbangga sa usa ka bus sa Ceres ug ambulansya, diin duha ang nangamatay.
Sa kinatibuk-an, dunay 300 ka mga driver sa Ceres bus nga gikinahanglan nga ipaubos sa drug ug driving test subay niining mga aksidente sa kadalanan sa Sugbo nga aduna’y
kalambigitan ang Ceres bus.
Gibutyag usab ni Montealto nga niadtong Nobiyembre 5 lang gani, anaa sa 50 ka drivers ang nipaubos sa refresher training nga unta mamahimo nga di ingon niana ka daghan.
Dugang niya nga anaa na sa 160 ka drivers ang nahuman sa refresher training.
Nakasabot usab ang ahensiya sa maong kompaniya tungod kay posible nga nahadlok kini tungod kay dakpon kon way mapakita nga dokumento nga nipaubos na sa maong mga bag-ong rekisito.
NANGATANGGONG
Sukad niadtong Nobiyembre 4, naobserbahan ang pagminos sa mga bus, labina sa dayong gabii.
Gatusan ka mga pasahero nga nag-atang sa mga mall sa Dakbayan sa Sugbo ug Mandaue ang nangatanggong.
Sa Nobiyembre 6, sayo pa lang niminos ang gidaghanon sa mga Ceres bus sa kadalanan.
Si Labella nakasabot sa pagpailawom sa mga drayber sa refresher course.
“Ang importante ang pagka mabinantayon sa ilang mga driver, unya gi-seminar ni karon because many of their drivers are not from Cebu City so they are not quiet familiar with our streets in Cebu City,” padayag ni Labella.
Nangindahay ang mayor nga wa nay mga aksidente nga mahitabo human niini.
“Hopefully magpadayon nga wala nay mga disgrasya kay diha sa atong meeting, they gave us the assurance, commitment like the speed limit,” dugang sa mayor.
Si Labella pabilin nga nibarog sa iyang unang pamahayag nga kon dili mapalambo sa Ceres ang ilang operasyon ug kanunay kining makasugat og disgrasya, mapugos siya pagpahunong sa ilang operasyon dinhi sa dakbayan para maprotektahan ang kinabuhi sa mga Sugbuanon. /